Çem paşpê na herikin

               

      Avên çema her dem berjêr di herikîn, tu hêz nikare çema berjor bide herikandin. Av, astengên  li ser rê   bi hêza xwe paqiş dike û di herike. Ew astengî kevir bin bi xwe re kaş û berkaş dike, zinar bin vedikole hergiz ji xwe re rê vedike. Bendav jî nikarin li dij vê şîpê li pîya bimînin, hêza ava çem bendavan di hilweşîne û rêwîtî ya xwe dom dike. Ev zagona xwezayî ye, tu tişt nikare bi guherîne.

      Pêşve çûnên  civakî jî wek herikandina çema ne, li ber bendav bên damezrandın jî; astengî bên afirandin jî bêkêr e. Pêvajo ya em tê de ne, li Rojhilata Navîn nîşan da ku rejîmên otokratîk, despot  yeko yek hilwedişin û civat  dixwaze bi rewşeke demokratîk bijî.  Dîktatorên qirase  di qulipîn, di dewsa wan de rejîmên pirrengîn û pirdengî tên damezrandin. Çimkî  di rojeva sedsalê de cîyê rejîmên dîktatorî  û despotîk tune. Lê belê rêxistinên hîna îdeolojîya sedsalên kevin yên dewra ‘şerê sar’ di hebînin bi rêzkarîya Stalînîzmê di meşin nikarin ji daxwazên gelan  re bibin bersiv. Yên ji xwe re tevgera Kemalîzmê dikin mînak jî nikarın gelê Kurd rizgar bikin, ev bêderfet e. Di bin pira re gelek av herikî, êdî ev sîyasetên  paşverû pere nakin.

     Daxwaza gelê Kurd xwedî dewletbûne, an ne mimkûn be federasyone. Tu hêz nikare cardin Kurda bi dek û dolab bike bin tesîra rejîmên otokratîk û  dewletên dagirker. Kurdan gelek zordarî û  tadeyî dîtin, nikarin  ji bîr bikin. Sed sale Kurd ji bo azadî û rizgarî yê di têkoşînê de ne, gelek jî berdêl dane. Rêxistinên neKurdî û hevkarên dijmin hewl didin ku Kurda  paşpê bi meşînin cardin bikin koleyên dewletên dagirker. Ji ber wîye di bin kirasê çepgirî û soyalîstî de  Kurdan ji koka wan, ji dîroka wan di qetînin. Nirxên netewî li ber wan reş dikin, şexsîyetên Kurda bi  buxtanan tawanbar dikin. Ava zelal bi çilkek(dilop) ava şêlo na herime û çem jî paşpê na herikin.

      Wek hemû gelên cîhanê mafê gelê Kurd jî heye ku bibe xwedî dewletek serbixwe, bextê xwe bi destê xwe vebuhtin bike. Ev maf, ji netewebûna wî tê û ne hewceyê destura tu kesekî ye. Neyarên Kurda gor rewşa demê bi taktîk polîtîkayên nû nerîtandin, li erdnîgarîya Kurdistanê rêxistinên  tarî û neKurd  saz kirin. Armanc, Kurd  azad nebin û heta bêdawî di bin bandora wan de bimîne; rizgar nebe. Van rêxistinên xurekên xwe ji …îzm’an hilgirtine ji xwe re hinek kes jî kirin …îst bi vî awayî xurt bûn.

      Xurtbûn û çekên  di destên wan de bû hêz, hêzeke bêkontrol çêbû. Bi vî hêzê îdeolojîya xwe, tevgera xwe pozberê Kurda kirin. Heçê Kurdên li dij wan derketin hatin kujtin an bi gefan tirsandin. Xwestin Kurda wek mirîd li pey xwe bi meşînin û cardin bikin bin baskê dagirkeran. Li ba wan ne mafê mirova heye, ne jî çirûska demokrasîyê heye. Despot, zordar  xwe bi zorê pêşeng û serok danezanîn. Ser  navê gel tiştên sosret kirin, provokasyonên mezin kirin. Viyana gel rehîn girtin, bêdestûra  gel gorî xwe bi hêzên tarî re ketin têkilî û bazarê. Naveroka bazarê ne azadîya gel bû û ne jî rizgarîya gel bû, li ser tiştên vala bazar dikin.

      Her çiqas Kurd îro bêdeng bin jî, naxwazin dev ji doza pîroz berdin û ji hineka re  bibin peyik. Dilevînên welatê xwe ne, evîndarên Kurd û Kurdistanê  ne. Heta mirinê xewn û xeyala hemû Kurdên bi xîret û bi rûmet  welatek azad e. Çawa ava çema paşpê na herike, tu hêz jî nikare Kurdan ji vê dozê  bide pêximandin.
   

     Erdeheja li Wanê qewimî  xwîn dilopand dilê me, me konê  şînê di dilê xwe de vekir. Bila serê gelê Kurd sax be, xwedê rehma xwe li mirîyan bike û şifa bigihîne birîndarên erdhejê. Gelî xêrxwazan piştgirî û piştevanî ji buy Wanîyan ! Roj ev roje, biratî ya xwe nîşan bidin…Li gel silav û rêz.  

26 Kewçêr 11
Tevger Çekdar

Nerîna min :