Berpirsekî îdareya Zûmarê ragihand ku, Serokwezîrê Kurdistanê Nêçîrvan Barzanî, nahiyeya Zûmarê ji cihekî wêran guhert bo cihê jiyanê. Herwiha niha rewşa nahiyeyê pir baş e û % 70ê ji welatiyan vegeriyane û di jiyaneke xweş de ne.
Derbarê serdana Serokwezîr Nêçîrvan Barzanî bo navçeya Zûmarê, Rêveberê Nahiyeya Zûmarê Mizahim Silêman ji KDP.info re ragihand: “Serokwezîrê Kurdistanê di serdana xwe de bo navçeya Zûmarê soz da me ku di demeke zû de xizmetê vegerîne navçeya Zûmarê û derdora wê û şûna şer li wir nehêle. Herwiha fermana çend pirojeyekî girîng bo navçeyê derxist.”
Mizahim Silêman wiha got: “Serokwezîr Barzanî li wir serdana Hêzên Pêşmerge yên li navçeyê kir, ku ew serdan pir bi bandor bû li ser moralê wan. Em spasiya wî dikin li ser van alîkariyan û li ser vekirina van pirojeyan, ku nahiyeya Zûmarê ji cihekî wêran guhert bo cihê jiyanê.”
Silêman wiha domand: “Niha rewşa nahiyeya Zûmarê û derdora wê pir baş e û aram e û % 70ê ji xelkê vegeriyane ser malên xwe û niha navçe ji şûna şer paqij bûye û niha rewşa jiyanê asayî bûye.”
