Serokê Îranê Mesûd Pezeşkiyan ji medya Qeterê re got, “Em ji bo her êrîşeke leşkerî ya Îsraîlê amade ne. Heke pêwîst be hêzên me dikarin di hundurê Îsraîlê armanca xwe pêkbînin.”
Di hevpeyvînekê de bi kanala El Cezîreyê ya li Qeterê re, Serokê Îranê Mesûd Pezeşkiyan helwesta Îranê ya li dijî Îsraîlê û pêşketinên dawî yên li herêmê nirxand.
Pezeşkian diyar kir ku Îsraîlê êrîşî Îranê kiriye û bi tundî bersiv daye û got, “Em ji bo her êrîşeke leşkerî ya Îsraîlê amade ne. Hêzên me dikarin heke pêwîst be di hundurê Îsraîlê de ji nû ve armancên xwe pêkbînin. Îsraîlê êrîş li dijî me kirin, û me bi tundî bersiv da û li hundurê wan xist. Lêbelê, Îsraîl windahiyên ku di van êrîşan de ji raya giştî girtiye vedişêre.”
Pezeşkiyan got, “Îsraîlê xwest ku bi hilweşandina hikûmeta Îranê welatê me hilweşîne û ji holê rake, lê ew bi ser neketin. Bê guman, hin înfîltrasyon hebûn, lê teknolojiya Amerîkî û karanîna wê di vê yekê de rola sereke lîst.”
Pezeşkiyan tekez kir ku ew şer naxwazin û got, “Lêbelê, em nikarin tenê xwe bispêrin agirbestê û bêparastin bimînin. Em ê bi tundî xwe biparêzin. Îsraîl hewl dide ku bandora êrîşên me yên mûşekî veşêre, lê daxwaza vê rejîmê ya rawestandina şer bi zelalî paşxaneya tiştê ku diqewime eşkere dike.”
Serokkomarê Îranê got, “Îran qet teslîm nebûye û teslîm nabe, ev rastî baş tê zanîn. Lêbelê, em welatek in ku baweriya xwe bi dîplomasî û diyalogê tînin. Welatên herêmî di şerê dawî de di astek bêhempa de piştgiriyek xurt nîşanî Îranê dane.”
Pezeşkiyan bal kişand ser helwesta zelal a Îranê li ser çekên nukleerî û got, “Xwedîkirina çekên nukleerî li dijî helwesta me ya siyasî, olî, mirovî û stratejîk e. Çalakiyên dewlemendkirina uranyûmê dê di çarçoveya qanûna navneteweyî de li ser axa me berdewam bikin.”
Serokkomarê Îranê, diyar kir ku danûstandinên potansiyel ên pêşerojê divê li ser bingeha nêzîkatiyek serkeftî bin, got, “Em gef û fermanan qebûl nakin. Serokê Dewletên Yekbûyî yên Amerîkayê Donald Trump dibêje ku divê Îran çekên nukleerî neyne. Em vê yekê qebûl dikin, ne ji ber ku Trump dibêje, lê ji ber ku ew fetwaya rêberê me (Ayatollah Elî Xameneyî) ye. Gotina ku bernameya me ya nukleerî bi dawî bûye xeyal e. Kapasîteyên me yên nukleerî ne di tesîsan de ne, lê di hişê zanyarên me de ne.”
Mesûd Pezeşkiyan derbarê êrîşa Îranê ya li ser Baregeha Hewayî ya El-Udeyd a li Qeterê ya ku xwediyê wê Amerîkî ye de got, “Me êrîşî Qeterê nekir û em ê nekin. Qeter welatê me yê bira ye û xelkê wê birayên me ne. Me tenê êrîşî baregeheke Amerîkî kir ku welatê me bombebaran dikir. Ez hestên birayên me yên Qeterî fam dikim. Ji ber vê yekê min bi Emîrê Qeterê re bi telefonê axivî. Niyeta me ya li hember Qeterê biratiye. Em amade ne ku bi her awayî alîkariya wan bikin.”
