Partiya DEMê îdiaya Serokê BBPê Mustafa Destici ya ku digot Partiya DEM dê xwe hilweşîne, bi daxuyaniyek nivîskî red kir. Di daxuyaniya Partiya DEMê de wiha hat gotin: “Partiya DEMê têkoşîna gel ji bo wekhevî, azadî, demokrasî, edalet û aştiyê temsîl dike. Ew îradeya bi mîlyonan kesan e. Ne nîşanek e, ne jî demkî ye.”
Serokê BBPê Mustafa Destici berê îdia kiribû ku Partiya DEMê dê xwe hilweşîne û gotibû: “Ne tenê PKK, lê PJAKê li Îranê jî dê xwe hilweşîne. HSD, YPG û li Sûriyeyê jî dê xwe hilweşînin. Heta ev Partiya DEMê li Tirkiyeyê jî. Ji ber ku ew jî partiya PKKê ye. Ew ê xwe hilweşîne, terorîzmê şermezar bike û partiyek nû ava bike.”
Partiya DEMê bi daxûyaniyekî ev yek red kir. Di daxuyaniyê de tekez kir ku partî bi dayîna bedelên giran û bi têkoşîna bênavber gihîştiye vê astê û tekez kir ku armanca wan ew e ku aştî û demokrasiyê ji bo 86 mîlyon welatiyan ava bikin.
Daxuyanî wiha domand: “Dev ji hewldana astengkirina rêya me bi derew, tahrîf û buxtan berdin. Em partiya xwe hilnaweşînin. Em li cihê xwe dimînin û meşa me bi biryardarî berdewam dike. Em ê tu carî paşve gav neavêjin.”
Daxuyanî bi van gotinan bi dawî bû: “Şîreta me ji we re ev e ku hûn bibin berdevkê aştî û demokrasiyê, ne dijminatiya li dijî Kurdan, şerxwazî, gotinên nefretê, nijadperestî û zîhniyeta şerê taybet rêvebibin.”
