Sala 2015an bila bibe sala aşitî, azadî , serfirazî û yekgirtina Kurd û Kurdistaniyan

Bi xweşî  û nexweşiyên xwe ve me saleke din jî li dûv xwe hişt.

Sala 2015an li ber me ye. Sala nû dê gelek guhertinên dîrokî  bi xwe re bîne.

Jibo ku Sala 2015an li her çar perçeyên Kurdistanê  û li temama cîhanê, bibe sala azadiyê, bibe sala pêşketin û serfiraziyê hêvî  û baweriyên  me geş in , xurt in.

Rizgarkirina Şingalê, dê bibe destpêka  serxwebûn û  azadiya  Başûrê Kurdistanê.

Li Rojavayê Kurdistanê, bi berxwedana Kobanê û  bi pêkanîna  Mitabaqata  Dihokê, bi îdareyeke li ser esasê  bi hemahengî, yekgirtin û bihevre birêvebirina hemû partîyên  Kurd û Kurdistanî, dê rêya azadîya Rojavayê Kurdistanê vebe, xurt bibe.

Li Rojhilatê Kurdistanê,têkoşîna gelê me ya azadiyê berdewam e. Rrejîma Îranê dê nikaribe demeke dûr û dirêj  vê siyaseta xwe ya li dijî mirovayetiyê bidomîne. Bi  yekitîya hêzên Kurd û Kurdistanî, dê têkoşîna gelê Kurdistanê geştir bibe.

Li Bakurê Kurdistanê, siyaseta  ev  90 sal e li ser esasê ‘’yek dewlet, yek milet, yek welat, yek al’’ê hatiye meşandin îflas kiri ye. Û êdî tu pîne dê nikaribe, rê li ber têkçûna vê siyasetê bigire. Bêyî  ku şîddet bê bikaranîn, bi xebat û rêyên siyasî, miletê Kurd û hemû  gelê Kurdistanê dê ala azadiyê hîn geştir û hîn bi hêztir bilind bike.

Bila sala 2015an bibe sala diyaloga neteweyî, bila bibe sala avakirina stratekiyeke neteweyî.Bila her kurdek destekeftineke her Kurdekî wek destkeftina xwe bibîne û van destkeftinan biparêze. Bila Kurd şerê navxweyî nebînin. Bila hemahengî û yekgirtina Kurdên cîhanê geş û xurt bibe.

Partîya Azadîya Kurdistanê li Bakurê Kurdistanê hêvîya hemû Kurd û Kurdistaniyan ê.

Bila sala nû  sala, aşitî, azadî, serfirazî  û geşbûna û yekgirtina  hemû Kurd û Kurdistaniyên cîhanê be.

Bila sala nû li hemû cîhanê  sala  aşitiyê, edaletê, azadîyê  , demokrasîyê  û mafê mirovan be.

Mustafa Özçelik

Serokê Giştî yê Partîya Azadîya Kurdistanê (PAK)