DTP Hate Gırtın,Kî Mefadarın?


 

Dadgeha Destûrî ya Bıngehîn lı Turkîya,paş dûvçûn û gengeşeyek çar rojîde,bı wergırtına bıryareka lezgîn û bı hevdengî bıryara gırtına partîya DTP ê ya bı serokatîya Ahmed Turk ragıhandın.Zêdebarî dıgel herdu hevserokên partîyê Ahmed Turk û Aysel Tuxluk de bo mawey 5 sala jî qedexeya syasetkırınê danîn ser 37 endamên parîyê û hemî mal û mulkên partîyê jî hate desteserkırın.Dı evê bıryara seyr û serıncrakêşde du egerên serekî hatıne destnîşankırın.Ew jî “çalakî yên şîdetê” û “pıştevanîya terorê”,ango mabest pê pıştevanîya PKK ê ye.Wate;DTP ne jıber parastına mafen çarenıvîsî yên neteweyî yên Kurd û ne jıber armanc û berjewendîyên Kurd ûKurdıstanê hate gırtın.Mıxabın!

 

Bêguman gelek der dorên xêrxwaz û demokratên Turkîya û yên Kurdıstanê jî dı evê qonaxa nazık û watedar de ne lı hêvîya bıryareka weha bûn. Lewra herçıqas daxweyanîyên partîyên nîjadperstên Turkîya yên wekî CHP û MHP û hwd.gıvaştıneka dıjwar dıxıstın ser hukûmetê û daxweyanî yên rêvebırên DTP ê û rûdanên evê dumahîkê qonax berev xetımandınê dıbırın jî,belê herweya jî dırıjdîya hukûmetê ya bo pêşvebırına evê qonaxa ku navê wê kırıbûn “vebûna demokratîk”,ıhtımala bıryareka weha zeîf dıhate dîtın.Lewra ev bıryara henê dı encamde careka dî dê bıbe egera vegerandına tırsa lı ser cıvatê û bêtır belavbûna tundî û dıjwarîyê.Belku metırsîya herî mezın jî,jı sînorên rojhelatî welat heta bı rojavayî Turkîya peydabûna rewşeka berelayî ya berfıreh e.Ku dı peydabûna rewşeka wehade cemawerên Kurd dê bı şêweyekî gıştî zerarmend be.

 

 Zêdebarî,jı bılî evan 2-3 heftîyên dumahîkê,ev serê 7-8 heyvane ku jıber peydabûna atmosfereka rengeazadî ya bîr û ra,rewşenbîr û sîyasetmedarên Kur dêdî pıçekî bı bıstehî dıkarîbûn raman û daxwazên xwe bînın zıman û herweha daxwazên neteweyî yên Gelê Kurdıstana Bakur bıgehînın ra ya gıştî ya navneteweyî jî.Heger hat û dı pêşerojê de kaos û berelayî peyda bıbe ev deng jî dê bêne bırîn û ew der û dor jî dê zeremend bın.Hındek layenên dî yên sîyasî jî hebûn ku bı hêvîyeka pır mezın pışta xwe bı evê qonaxa “vebûna demokratîk”ve gırêdabûn ku xwedê gıravî dê rewş bıbe behışt û ew jî dê jı nûve dı ewê meydanê de sıyasetê bıkın.Ew layen jî dê bıbın mexdûrê evê rewşa nû.

 

Bêguman heger hat û Hukûmeta Erdoxan sıstayî xıste projeya xwe ya “vebûna demokratîk” yan lêvebû,yan jî pêşî lı berelayî yê negırt û ev qonax berovajî bıbe û bête xtımandın,aha hıngê yek jı zerermendê herî mezın dê partîya Erdoxan,yanî AKP be.Belkî were lı sıfrê raweste û bınbır bıbe.

 

Başe gelo dê kî jı evê rewşê fayde bıbîne? Yan dê kî bıbe mefadarê rewşa qaos û berelayî yê?

Lı bîra meye,jı roja ku prosesa,yan projeya “vebûna demokratîk” destpêkırî û heta nıha partîya Komarî ya Kemalîst (CHP) bı dıjwarî dıjî evê rêka çareserîyê derdıkevın û heta lı evê dumahîkê alîkarê serokê wê partîyê,Onur Oymen bı aşkerayî got ku “Ataturk çawa serhıldana Dersım ê jı bın bır,pêdıvîye em jî evro bı ewî şêweyî evê pırsgırêkê jı bın bıbın”.Lewra bı gırtına partîya DTP ê û xetımandına qonaxa “vebûna demokratîk” CHP dê mefadar bın.

 

Partîya nîjadperest ya MHP jî her roja pêşînde dıjayetîya evê projeya çareserîyê dıkırın û nefreta wan ya dıjayetîya Kurda gehışt ewê radeyê ku seroka wan Dewlet Baxçelî behsa ewan gerîlayên ku jı Qandîlê vegerîya Turkîya kır û got “heger ew bên êdî emê herın çîyê”.Paş bıryara dadgehê jî yekser daxweyanî da û got “pêdıvîye hemî kes rêzê lı evê bıryarê bıgre”.Wate,ew jî jı evê bıryarê mefadare.

 

Rewşa sererkanîya Turkîya jıxwe pêwîstî bı gengeşe nake.Her ew eqlîyeta jonturkane ku heta nıha nehatî guhertın ku jı bılî kuştın û wêrankırınê çı rêkên dî nızanın û nevên.Lı ser dırêjîya dîroka wan her û her qesta kuştın û sêdaredana mırovên Kurd û rêvebırên wan kırıne û Kurdıstan jî her kavıl û wêran kırıne û dıkın.Ew jî mefadarên evê encamêne.

 

Bêguman dı cepheya Turkîya de yên mefadar dê hêjî hebın.Lewra layen û dezgahên Kemalîst û nîjadperest gelekın.Û eve hemî jî bı mın waye  ne gelekî seyr û balkêşe.Lewra eqlîyeta wan wehaye.Yanî hebûna Kurda û serkeftına Kurda bo xwe metırsîdar dı bînın,wekî bınbırbûna xwe dı helsengînın.

 

Belê mefadarîya herî seyr û balkêş cepheya Kurdaye.Lewra lı bîra meye,dema qonaxa “vebûna demokratîk” destpêkır serokê DTP ê Ahmed Turk,bı navê partîya xwe wekî rêberê Kurda dı gotara xwe ya rojnamevanî da pêşewazîya “vebûna demokratîk” kır û bo hukûmeta Turkîya jî gote “em muhatabê evê çareserîyêne”!Bêguman keyfa hemî Kurdên dılsoz bı evê helwest û berpırsîyarîya A Turk hat û ew hêvî jê hate kırın.Û serokwezîrê Turkîya,Erdoxan jî derbarey evî babetî de kombunek lı gel wî kır.Belê mıxabın A Ocalan yekser jı Îmralî daxweyanîyek da û gef lı herduyan jî kır û got çênabe ev pırsgırêk lıgel DTP bête çareserkırın!Jı ewê rojê û pêda êdî A Turk û DTP Îmralî wekî adresa çareserîyê destnîşan kırın û lı evê dumahîkê jî waz lı projeya çareserîyê anîn û hemî –alakîyên xwe tenê xıstın xızmeta fırehkırına çend santîmên ewê odeya Îmralî.DTP hate gırtın û nıha bo çareserîyê yekemîn adres bu Îmralî.Lewra  dı cepheya Kurda de A Ocalan dıbe yekemîn mefadarê evê bıryarê!

 

Duwemîn mefadara Kurd hevseroka DTP Emîne Ayna ye.Lewra Emîne Ayna dı gotara xwe de gotıbû “bıngeha partîya me dıxwazın em derkevın çîya”.Yanî dıxwazın Emîne Ayna bıbe gerîlla.Înca partî jî hate gırtın û Emîne Ayna jıber ewê gotara xwe nehate sezadan jî.Lewra ew jî bû mefadarê evê bıryara dadgehê.Yanî êdî dıkare derkeve çîya û bıbe gerîlla.Dewlet Baxçelî û Emîne Ayna,herduan jî behsa çîya kırıbûn.Em dê bînın ka kî çı dıke.

 

Lı dumahîkê jî derbarey evê qonaxê de mırov dıkare bêje ku ewên bıserketın Kemalîzm,şerxwaz û dewleta kûr e.

 

Selîm Giresorî

11.12. 2009

Bersiv :

Nêrîna te
Nav: