Turk: Sebir û baweriya min nema

Mêrdîn: Hevserokê BDPê yê berê û namzedê serbixwe yê Mêrdînê Ahmet Turk di hevpeyvîneke taybet de bo Rûdawê rewşa dawî ya Kurdistan û Tirkiyê nirxand û got:
– Baweriya min nemaye ku dewlet pirsa kurd bi rêyên aştiyane careser bike.

Turk ragihand ku serokwezîrê Tirkiyê Recep Tayyip Erdogan her dem dîktatorên cîhana Ereb rexne dike û got:
– Lê zextên ku ew dîktator li ser gelê xwe nakin, Erdogan jî li se gelê kurd dike.

Siyasetmedarê kurd Ahmet Turk da zanîn ku pakêta AKP`ê ya bi navê vebûna demokratîk pakêtek vala derket û got siyaseta AKP`ê ya derbarê kurdan xapandin e. Turk, hevdîtinên li Girava Îmraliyê yên bi serokê PKK`ê Abdullah Ocalan re tên kirin jî wek manevra û helwestên dem derbasbûnê binav kir û wiha axivî:

– Kurd di wê baweriyê de ne ku dewlet beriya hilbijartinê dixwaze reaksiyonên kurdan nerm bike,  demê pê derbas bike û bi wan re hêviyek çê bike, bi Ocalan re li Îmraliyê diaxivin. Herwesa gel li benda encamên hevdîtinê jî disekine. Lê ti tiştek dernakeve. Di şûna gavên demokratîk û niyêtên baş de li bajaran hevalên me tên girtin û li çiyayan li dijî gerîllayên bê çalak operasyonên dijwar tên kirin. Vê jî hem baweriya min, hem baweriya gel şikand.

Ahmet Turk qet ne bawer e ku niyeta AKP`ê û ya dewletê hebe ku di demeke nêzîk de pirsgirêka kurd di parlamentoyê de çareser bikin. Derbarê çalakiyên neguhdariya sivîl û rolê parlamentoyê de Turk wiha axivî:

– Ji aliyekî ve ji kurdan re dibêjin dev ji çekan berdin û li aliyê din jî tehemûlê ti çalakiyekî gel a demokratîk nakin. Wê pirsgirêk çawa bê çareserkirin? Em niha dixwazin herin parlamentoyê, ji ber ku em wê derê wek cihê çareseriyê dibînin, ne ku em dixwazin herin û rûnên. Lê eger hûn pêşî li hemû rêyên demokratîk bigirin, hûn ê rol û wateya parlamentoyê jî ji holê rakin.

“Erdogan dîktatorê herî mezin e.”

Derbarê atmosfera hilbijartinê de jî Turk da zanîn ku AKP bi hemû derfetên dewletê li Kurdistanê propagandaya hilbijartinê dimeşîne û ji wan re jî astengiyan derdixe. Turk gotinên serokwezîrê tirk Erdogan ên derbarê dîktatorên Ereb jî bibîrxist û got:

– Dibêje ku serokê Libyayê, Misrê û Tunûsê dictator in, zextan li gelê xwe dikin. Lê ew çi dike? Bi sedan rewşenbîrên kurd û tirk xistiye zindanê, tenê di meh û nivê dawî de 900 endam û alîgirên partiya me xist bin çavan. Ev dîktatoriya herî mezin e.

Ahmet Turk di dawiya axaftina xwe de operasyonên li dijî gel li bajaran û li dijî gerîlla li çiyayan bibîrxist û got:

– Hemû rêyên demokratîk û aştiyana girtine. Ez bi xwe kesekî zêde aştîxwaz im, min her tim bi hêviyeke mezin li pêşeroja Tirkiyê mêze kiriye û her tim daxwaziya aştî, biratî û demokrasiyê kiriye. Rêyên aştîxwaz ji bo min rêbazên siyasî yên bingehîn in. Lê bi rastî êdî bi min re jî ne ew sebir maye û ne jî bawerî maye ku dewlet û AKP pirsgirêka Kurd bixwazin çareser bikin. Mixabin ez dilsoziyeke wisa nabînim. Eger ev sebir bi min re nema be, ka hûn bifikirin hestên xortekî 20 salî niha çawa ne.

Nerîna min :