Serokwezîr ji bo azadkirina Ocelan îmza kir
Li bajarê Hewlêrê duhî li avahiya civata wezîran, serokwezîrê Kurdistanê Nêçîrvan Barzanî bi îmzekirina kampanyaya 5 milyon îmzeyî ya ji bo azadkirina rêberê PKKê Abdullah Ocalan îmzeya xwe avêt.
Elî Mehmûd endamê kampanyaya 5 milyon îmzeyî, di vê derbarê de ji Rûdawê re got:
– Wekî kampanyaya komkirina îmzeyan a ji bo azadkirina Ocalan, me serdana serokatiya civata wezîran kir. Em ji aliyê serokatiya hikûmeta herêma Kurdistanê ve hatin pêşwazîkirin.
– Nêçîrvan Barzanî serokê hikûmeta herêma Kurdistanê demekê digel me rûnişt û piştgiriya xwe ji bo kampanyayê anî ziman. Piştre jî îmzeya xwe ji bo azadkirina Ocalan avêt.
Mehmûd spasiya serokwezîrê Kurdistanê Nêçîrvan Barzanî kir û got ku, ev helwesta serokwezîr cihê dilxweşî û rêzgirtinê ye.
Ev çend heftene kampanyayek bi navê 5 milyon îmzeyî ji bo azadkirina Ocalan li 4 parçeyên Kurdistanê dest pê kiriye. Biryare milyonek îmze li herêma Kurdistanê bên komkirin.
Rêberê PKKê Abdullah Ocalan 15ê sibata sala 1999ê ji welatê Kenyayê dîl hat girtin û radestî Tirkiyê hat kirin.