Di duyemîn roja Konferansa Asayîşa Munchenê da, îro şemiyê 15.02.2025ê piştî nîvro, birêz Nêçîrvan Barzanî Serokê Herêma Kurdistanê bi birêz Nîkol Paşînyan Serokwezîrê Ermenistanê ra civiya.
Di civînê da, peywendiyên Iraq û Herêma Kurdistanê bi Ermenistanê ra û çawaniya bihêztirkirina hevkariyan di warên aborî, çandî, kar û bazirganî da gotûbêj kirin û di derbarê geştên asmanî yên di navbera Hewlêr û Êrîvanê da nêrînên xwe danustandin kirin.
Serok Nêçîrvan Barzanî xwesteka Herêma Kurdistanê ya ji bo bihêztirkirina peywendiyên bi Ermenîstanê ra diyar kir û balkişand li ser wê yekê ku her du alî dikarin di warên curbicur da hevkar bin bi taybetî di wan waran da yên ku ji bo her du aliyan pêwîst in.
Serokwezîr Nîkol Paşînyan, xwesteka Ermenistanê ya ji bo berfirekirina peywendiyên bi Iraq û Herêma Kurdistanê ra nîşan da û rola Herêma Kurdistanê, wek nimûneya pêkvejiyan û aramiyê li navçeyê, bilind nirxand.
Rewşa siyasî û ewlekarî ya Rojhilata Navîn digel çendîn mijarên din yên xwedî berjewendiyên hevbeş di vê hevdîtinê da hatin behis kirin.