Li Iraqê di çarçoveya têkoşîna li dijî gendeliyê de 8 parlamenter û serokên parêzgehên Selahedîn û Nînowa hatin girtin.
Endamê encûmena parêzgehê Yasîn Mihemed Elî ji Rûdawê re got: “Heya niha 6 berpirs bi tometa gendeliyê li parêzgeha Selahedînê hatine girtin ku 4 ji wan parlamenter, cîgirê wezîr û rêveberek giştî ne.
Di nav girtiyên Selahedîn de Musanna Samarai, serokê hevpeymaniya Ezm û parlamenter; Parlamenterê Hevpeymaniya Ezam Hind Abbasî; Eşwaq Selîm Hesen Cibûrî û Buşra Receb Qeîsî, parlamenterên Îtîlafa Nûavakirin û Pêşdebirinê.
Ednan Cumayîlî, cîgirê berê yê wezîrê petrolê û Kolonel Cibûrî, rêveberê tenduristiyê û parêzgarê berê yê Selahedînê, di nav wan girtiyan de ne.
Endamê encûmena parêzgeha Selahedînê ragehand ku, êvariya roja duşemê 400 defter dolar di nav otombîlekê de li xala kontrolê ya Ebas Çoma ya Xurmatû hatiye desteserkirin. Duh xebatkarên ku pere desteser kirin ji aliyê Alîkarê Wezîrê Karên Hundir ve hatin xelatkirin.
Ji aliyê din ve, Serokê Komîteya Asayîş û Berevaniyê ya Encumena Parêzgeha Neynewayê Mihemed Casim Kakeyî îro Çarşemê ji Rûdawê re ragihand, 2 parlamenterên bi navê Mihemed Ferman Şehr Cebbî ji Fraksiyona Teqadum û Ebdulrehman Luizî ji Hevpeymaniya Avakirinê hatine girtin.
Li gor serokê komîteya asayîş û berevaniyê ya encumena parêzgeha Nînowa, Mihemed Ferman Şehr li Nînowa hatiye girtin û Ebdulrehman Luizî jî bo Bexdayê hatiye gazîkirin û li wir hatiye girtin.
Endamê Encumena Parêzgeha Kerkûkê Ebdullah Mîrweys îro Çarşemê ji Rûdawê re got: “Heya niha operasyonên asayişê li ser Kerkûkê nehatine girtin û ti berpirsek jî nehatiye girtin.
