Di peyamekê de ku ji aliyê Baregeha Barzanî ve hat belavkirin, Serok Mesûd Barzanî ragihand ku di hilbijartinên berê yên Encûmena Nûnerên Iraqê de gelê Kurdistanê padaşta helwest û xweragirî û qurbanîdanên Partiya Demokrat a Kurdistanê (PDK) da û daxwazê ji gelê Kurdistanê kir ku di vê hilbijartinê de jî piştevaniya Partiya Demokrat a Kurdistanê (PDK) bikin.
Serok Mesûd Barzanî herwiha ji xelkê Kerkûk û Şingal û navçeyên Kurdistanî yên din ên derveyê îdareya Herêma Kurdistanê daxwaz kir ku beşdarî hilbijartinê bibin û bi dengê xwe bersiva rastiya neyasayî û sepandî ya wan navçeyan bidin.
Peyama Serok Barzanî wiha ye:
Bi navê Xwedayê mezin û dilovan
Di hilbijartinên berê yên Encûmena Nûnerên Iraqê de gelê Kurdistanê padaşta helwest û xweragirî û qurbanîdanên Partiya Demokrat a Kurdistanê (PDK) da û bi piştevaniya gelê Kurdistanê, PDK bû partiya hejmara yek ya li Kurdistan û Iraqê. Hêvîdar im di van hilbijartinan de jî gelê Kurdistanê piştevaniya xwe ji bo Partiya Demokrat a Kurdistanê dûpat bike.
Her di vir de jî daxwazê ji welatiyên ezîz ên Kerkûk û Şingal û navçeyên Kurdistaniyên din ên derveyê îdareya Herêma Kurdistanê û bi taybetî daxwaz ji cemawer û alîgirên PDKê yên li wan navçeyan dikim ku bi coşî ve beşdarî hilbijartinê bibin û bi dengê xwe bersiva rastiya neyasayî û sependiya wan navçeyan bidin. Daxwaz jî ji welatiyên xweşdiviya Herêma Kurdistanê û cemawer û endam û alîgirên PDK dikim di roja dengdanê de erkê xwe yê neteweyî û niştimanî bi cih bikin û deng bi berbijêrên Partiya Demokrat a Kurdistanê bidin.
Bi pêwîst jî dizanim spasî endam û alîgir û hemû organên PDK bikim ku ji bo hilbijartina Encûmena Nûnerên Iraqê bangeşeyeke aram û medenî û mînakane peyrew kiriye.
Hêvîdar im hilbijartina Encûmena Nûnerên Iraqê li keş û hewayeke aram û bê kêşe birêve biçê û encamên wê jî li xizmeta pejirandina bingehên hevbeşî û dawakariya welatiyan be û îradeya rasteqîne ya gelên Iraqê bê bicîkirin.
Mesûd Barzanî
07.10.2021
