Ristek Lale

11/12/2013

Ristek Lale

Helbestvan Mizgîn Hesko

Di 20.mijdarê de sala 1973 li gundê Şelhûmiyê ( Qamişlo ) ji dayik bûye.
Ji berhemên wê yên capkirî:

1- Tîpên evînê-Çapxana Bafet –Adar 2007
2- Asoyekî tije Endeko—Weşanên Han –Tîrmeh 2008
3- Di nav henasên kovanan de—Weşanên Han—Adar 2010
4- Li ber pala welatekî birîndar diherikîm—Weşanên Han –Adar2012

Işq agir e, ten çiyayê Tûre e
Dil ew şecera bi nar û nûr e

Mişkate qefes, qebes çiraye
Can zeyt e, fetîlê wî cefaye

Ahmedê Xanî

Diyarî:

Ji bo Ayid

Çawa dawî ji nivîsê re nîn e, wiha jî hezkirin helbesteke bê dawî ye.

Ta niha û di jiyana min de, hîn jî tu ji diyariyên herî ciwan î.

Pêşgotin

Piştî ku em fêrî tîpên Kurdî (Latînî ) bûn, di destpêkê de me piraniya van helbestan ristibûn , kêm , zêde bi şêweyê Pêlawaz ( mîna Kilasîkên me yên qedirgiran ).
Wî çaxî me nediwêrîbû û jî nedikarîbû ,wan vekirî û hişkere belav bikin, yan jî hemiyan di yek berhemî de bidin çapkirin.
Ji lewra gerek bû ev dîwan hejmara yekê bigirtana , bi wata yekemîn berhem ronahî bidîtana, lê di pêş projeyê de asteng pirbûn.

Di havîna 2010 –an de û piştî (17) salan ji mişextiyê …em û bi rêkên taybet derbasî sînorên Qamişlo bûn, û me çavên xwe bi dîtina Welatê xwe şakir.
Wê gavê û mîna dayika ku zaroka xwe ji mêj ve windakiribe û careke din kezeba xwe bibîne, me wiha pêşwazî li wan helbestan kir , me ew bi dilşadî û kelogirî li himêza xwe vegerandin.

Di salên (1988- ta 1992 ) me ew zarok bi navkiribû ( Çerxa Felekê ) ku wî çaxî ji (45) çil û pênc helbestê pêk dihat.

Hêjaye gotinê ku Seydayê Tîrêj û bi riya hin hevalan re li wan nerîbû, û ji şêweyê me razîbû..û ta niha jî rûpelek bi xêzên destên wî li ba me ye.

Me hin helbest jê rakirin û hinên din tevlî kirin,,, salane sal û ev helbest ringênî di hişê me de dikirin, û bêguman da xwe ji wê ringêniyê rizgar bikin, me dawî biryara çapkirina wan stand, hin ji wan me awaz ji wan re çêkirine..helbestê awaza xwe bi me dida çêkirin.
Bi hêviya ku ew ciyê dilxweşî û razîbûna xwênerên helbesta Kurdî bin.

Di gel ciwantirîn ristên Laleyan