Ozçelîk: Ez hêvîdar im ku PKK ji çiyayan dakeve

Balyozê Tirkiyê li Îraqê Murad Ozçelîk di hevpeyvînekê de ligel Rûdawê behsa peywendiyên Tirkiye û herêma Kurdistanê yên piştî serdana Erdogan dike û dibêje: “Giringî û taybetmendiya serdanê hebû.” Ozçelîk derbarê pirsa kurd li Tirkiyê dibêje ji niha û vir de wê di çarçoveya proseya vekirina demokratîk de hemû mafên kurdan bên dayîn, herwiha dibêje: “ez hêvîdar im ku PKK ji çiyayan dakeve.“

Pirs: Hatina Erdogan bo herêma Kurdistanê çi peyameke xwe heye?

Murad Ozçelîk: Taybetmendiya serdana Erdogan bo Hewlêrê hebû. Ji vir û şûnde wê peywendiyên navbera Tirkiye û herêma Kurdistanê gelekî bi hêz bin û wê bighîjin  astekî pir bilind. Vekirina qonsolxane, bankên tirkî û hêla asmanî ya Turkish Airlines, baştirîn mînak in ku em bêjin peywendiyên me yên bihêz ligel herêma Kurdistanê hene û em kar ji bo wê yekê dikin ku hêjî bihêztir bikin.

Pirs: Erdogan çawa biryar girt ku serdana herêma Kurdistanê bike?

Murad Ozçelîk: Herêma Kurdistanê girîngiya xwe heye. Bi rastî serdana serokwezîrê Tirkiyê, dîrokî bû, hem ji bo vê hêrêmê û hem ji bo Tirkiyê, ji ber ku ev yekemîn serokwezîr e li ser astê hemû dinyayê û li ser astê Tirkiyê ku bi fermî serdana herêma Kurdistanê bike.

Pirs: Prosesa vebûna demokratîk li Tirkiyê di çi qonax de ye?

Murad Ozçelîk: Niha em nikarin bi eşkereyî behsa hin tiştan bikin, lê ji niha û şûn de di çarçoveyê prosesa vebûna demokratîk de wê hemû mafên kurdan bên dayîn, eger daxwaziyên hin kes û aliyan hene, bila bi şêwe û rêyên siyasî be, em weke hikûmeta Tirkiyê û serokê herêma Kurdistanê, Mesûd Barzanî jî li ser wê prosesê yekdeng in.

Pirs: Niha çi daxwaziyên Tirkiyê ji PKK‘ê hene?

Murad Ozçelîk: Derbarê pirsa PKK‘ê em hêvîdar in ku ew biryarekê bidin û daxwaziyên xwe bi çekan nekin. Ji çiyan dakevin û li ser erdê daxwaziyên xwe bikin û bên nava meydana karê siyasî, ji ber ku dema şerê çekdarî nemaye, birêz Erdogan jî got divê xelk li ser erdê mafên xwe bidest bixin, lê ne li çiyayan.

Bersiv :

Nêrîna te
Nav: