Ji Weşanên HAN: "Di nav henasên kovanan de"

Dîwana nû ya helbestvan Mizgîn Hesko ji nav Weşanên HANê derket.

Dîwana nû ya helbestvan Mizgîn Hesko  ya bi navê “Di nav henasên Kovanan de” ji nav Weşanên HAN derket. Ev sêyemîn dîwana  Misgîn Hesko ye û herdu dîwanên wê yên berê niha weşandî  “Tîpên Evînê” (Avdara 2007 li çapxana Bafe) û “Asoyekî tijî Endeko”  (Tîrmeha 2008 ji Weşanên Han) ji aliyê xwendevanên Kurd dihête zanîn.

Mizgîn Hesko di dîwana xwe ya nû de helbestên bi mijarên cûr be cûr ketiye nav ceribandinên balkêş; bi taybet hesret, hesreta welat, xem, evîn, hestên avakirin û jiyandina dilsoziya têkeliyên bi nirx di helbestên wê de xwe wek babetên sereke didin diyarkirin. Zimanekî mûceret lê vekirî, ûslûbeke wek xwe û xas bikar aniye. Bi rastî ev car mirov xwe di nav henasên kovana de seh dike, lê jê eciz nabe. Jiber ku di helbestên Mizgîn Hesko de her kovan û keder bi dermanê bê dawî ya evîna bê sînor dihête saxkirin.

Dîwana nû ya Hesko ji 73 rûpelan pêk dihê û helbestên vê dîwanê bi rastî bi bêecizî û bêdijwarî, lê bi daxwezeke ji nav jiyanê xwe didine xwendin…

Weşanên Han bi weşandina “Di nav henasên di nav kovanan de” bi berhemeke nû ya bi nirx di pêşberê xwendavanên Kurd de ye…

Kerem bikin çend helbestên ji dîwanê…

KNN/Nahê Xan

 

Di nav henasên kovanan de-Mizgîn Hesko

 Berxê Kurda                                                                       

ji  Şehîd Ihsan Fatahyan re

 

Û te xwe tavêt

Bextê nûbariya Alê

Û wê gavê

Tu sernişîvî

Qedera Kewên bêzar

Bûbûyî

Û em sernişîvî

Matmayineke tahl

Bûbûn

 

Bi tenê

Bişirîna li ser lêvên te

Hin ji arê dîmenê

Sar dikir

Nerîna baz

Di cavên te de

Bêdengiya bîstikên dawî

Birîndar dikir

 

Û te … ha..ha bandikir

Karwanê şehîdan

Va ez jî têm

Min bi berfê bişonin

Berfa ku min jê hezkir

Û vê gavê

Di ahîna min de

Hate bişaftin

 

Ey berxê bê guneh

Bi navê gunahbaran

Tu vexwendî

Civanê Sêdarê kirin

 

Ma dêmên te … Binefş

Çi ji gunehan dizanin

 

Ma baskên te … kevok

Çi ji davkan dizanin

Ma xuşîna teyî dawî

                  Sipîndar

Çi ji zingardarên

Sêdarê dizanin

Ma barîna te … Fireşteyê berfê

                  Çi ji sohtinê dizanin

 

Ma dengê te awaza Kamkaran

Çi ji ritmên şer

Dizane

Ey berxê Kurda

Dibêjin

Berxê nêr bo ser birrîne

Lê ma çima berx

Di zozanê de

      Ne bi ciye

      Ne bi ware

      Ne bi hez û vîne

 

 

Ey xortê Kurda

Doza te…

Doza miletekîye

Ku gunahbar bû

Gava xwe li şûrê wan

Rapêça

Û li şaşikan mukir hat

Û kilîta buhiştê

Radestî wan kir

 

Erê em bi xwe gunehbarin

Hevbeşê mirina xwe ne.

 

Agir

 

Erê dayê

Em bûn neviyên

 Çolisatanan

Zarokên ku li ser Erzêlan

Radketin

Û li hawîrdora me

Guregura agir bû.

 

 Zindî  

 

ji bo wan kesên bê guneh ku di bûyera Siptemberê

de canê xwe ji dest dan.

 

 

Mîna çivîkan

Xwe ji hêlînê zerkirin

Ji tirsa sohtinê

Xwe di himbêza mirinê de

Werkirin

 

Ber laşê me winda nebî

                     Nebe xwelî

Da tu canê

Tevî mirinê

Bi min şabibî…!

 

21.11.2001

 

Nasnameya Dîwanê:

 

Mizgîn Hesko

Di nav henasên kovanan de

Weşanên HAN 22

Helbest 10

Edîtor: Zeynel Abidîn Han

Berg: Gazîn Onur Han

Wêneyê Bergî: Fehmî Balay

Çap:

Weşanên HAN

Bülowstr. 56, 10783 Berlin/Almanya

Tel: 00493023552540

[email protected] Ev e-mail ji ber spambots hatîye parastin, ji bo dîtina vê gerek JavaScript vekirî be

www.evra-kitap.com

 

 

Bersiv :

Nêrîna te
Nav: