Wezareta Paraztina Netewî ya Tirkîyê (MSB) bîlançoya operasyonên leşkerî yên ku ji alîyê Hêzên Çekdar ên Tirk (TAŞ) li ser xaka Rojava û Herêma Kurdistanê pêk anîn parve kir û di derbarê geşedanên li Kerkûk û herêmê de nirxandinek kir.
Şêwirmendê Çapemenî û Têkilîyên Giştî yê MSBê Oramîral Zekî Akturk, civînek çapemenîya heftane li dar xist, bîlançoya operasyonên leşkerî yên ku li Rojava û Herêma Kurdistanê ji alîyê Hêzên Çekdar ên Tirk (TAŞ) ve hatin lidarxistin parve kir.
Akturk da zanîn ku di hefteya dawî de 39 endamên PKK û YPGê di operasyonên hem li Rojava hem jî li Herêma Kurdistanê de jiyana xwe ji dest dane. Akturk diyar kir ku ji 1ê Çileyê heta niha hezar û 185, ji 24ê Tîrmeha 2015an û vir ve jî 38 hezar û 528 endamên PKK û YPGê jiyana xwe ji dest dane.
Hêzên Çekdar ên Tirkîyê bi salan e li nav axa Herêma Kurdistanê operasyonên hewayî, bejayî û bombebarankirina li dijî PKKê pêk tînin. Di heman demê de êrîşên bi vî rengî li Rojava li dijî Hêzên Sûrîyeya Demokratîk, ku pişta wan YPGê ye û wek “berdewama PKKê” bi nav dike, pêk tîne.
Akturk di derbarê bûyerên Kerkûkê de ev tişt gotin: “Kerkûk girîng e, em geşedanên li wir ji nêz ve dişopînin. Di xala me ya dawî de; Ji aliyê Meclîsa Federal a Iraqê ve biryara rawestandina îdamê heye. Wusa dixuye ku piştî vê yekê tişt aram bûne. Wisa dixuye ku aştî pêk hatiye, lê em geşedanên li wir ji nêz ve dişopînin”.
