Emê heta dawiyê pişta kurdên Sûriyê bigirin

Serokê dîwana serokatiya Herêma Kurdistanê, Fuad Husên, diyar kir, deriyê kongreya partiyên kurdên Sûriyê li Hewlêrê bo hemû aliyekî vekiriye û Herêma Kurdistanê dê li ser piştevaniya xwe bo kurdên Sûriyê berdewam be.

Fuad Husên, îro di civîna kurdên Sûriyê li Hewlêrê de, diyar kir, partiya yekitiya demokrastîk a Sûriyê (PYD), bi fermî, ji aliyê serokatiya herêmê ve bo kongreyê hatiye vexwendin, lê wan beriya kongreyê ji me re gotin ku beşdarî kongreyê nabin.

Husên, got, hinek medya û televîzyon îdia dikin ku partiyeke kurdên Sûriyê hatiye piştguhxistin, ev îdia qet rast nîne. Ew bixwe beşdar nebûne, ji ber ku me deriyê civînê li ser kesî negirtiye. PYDê bi telefonê, hêviya serkeftinê ji kongreyê re xwest.

Serokê dîwana serokatiya herêmê, wiha pêde çû, em nikarin pêşiya kesî bigirin û mafê me yê wê yekê jî tune. lê beşdarînekirina wê partiyê di civîna kurdên Sûriyê de tu bandorekî li ser encam û biryarên civînê nake, ji ber ku piraniya nûnerên kurdên wî welatî di civînê de amade ne.

Fuad Husên, wiha got, emê li ser piştevaniya xwe bo kurdên Sûriyê berdewam bin û ev yek heta bidestxistina armacên kurdan li Sûriyê dê bidome.

Husên, ragihand, Herêma Kurdistanê destê xwe naxe nav karên navxwe yên Sûriyê, lê wek beşek ji netewa kurd, erka xwe dibîne pişta partiyên kurdî li Sûriyê bigire. (AKnews)