Partiyên kurdan hilbijartinên Îranê baykot dikin

Partiyên Kurdistana Îranê yên li herêma Kurdistanê ne, bang li gelê rojhilatê Kurdistanê kirin ku, beşdarî hilbijartinên 2ê adara 2012ê ya parlamentoya Îranê nebin û baykot bikin. 

4 partiyên Kurdistana Îranê, Partiya Azadî ya Kurdistanê (PAK), Sazmana Xebatê ya Kurdistana Îranê, Partiya Demokrat a Kurdistanê û Komeleya Şoreşger a Zehmetkêşên Kurdistanê, îro li bara hilbijartinên parlamentoya Îranê preskonfrenseke hevbeş sa kirin û daxwaz li hevwelatiyan kir ku beşdariyê di hilbijartinên parlamentoya Îranê de nekin.

Li gor AKnews, di daxuyaniya her 4 partiyan de hatiye diyarkirin ku, hilbijartinên parlamentoya Îranê ji pîvanên hilbijartineke azad û demokratîk dûr in û parlamentoya Îranê nikare ji fermana rêberê Îranê Elî Xameneyî derkeve û:

– Ji ber vê yekê, bila gelê kurd li rojhilatê Kurdistanê hilbijartinên 2ê adara îsal a parlamentoya Îranê baykot bike û bila kuçe û kolan tenê ji bo hêzên serkutker bimînin.

Endamê rêvebiriya Partiya Demokrat a Kurdistanê, Kemal Kerîmî, bi nûnertiya her 4 partiyan diyar kir ku, ew wek 4 partiyên rojhilata Kurdistanê daxwaza baykotkirina hilbijartinên parlamentoya Îranê dikin. 

Kerîmî got:

– Me hewl da hemû partî û saziyên kurd ên rojhilatê Kurdistanê li ser vê helwestê yek deng bin,  lê mixabin tenê 4 partiyan ev yek qebûl kirin.

Hilbijartinên parlamentoya Îranê, 2ê adara 2012ê dê bê sazkirin.