Serokê Partiya Demokrat a Kurd Reşît Akici bi heyetekî ve tevlî kongreyaHUDA PARê ya li Diyarbekirê bû. Ji partiyên Kurdan tenê tevlîbûna akici balkêş bû. Serokê HUDA PARê û berpirsên wê bi germî pêşwaziya Akici kirin..
Akici di kongreyê de pîrozbahî li HUDA PARê kir û di axavtina xwe de got:
Bismîllahirrehmanirrehîm.
Birêz Serokê HÛDA PAR’ê,
Birêz endamên rêveberiyê,
Birêz mêvanên hêja,
Xwişk û birayên delal!
Ez we hemûyan bi rêz û hurmet silav dikim. Ez ji bo vê kongreya girîng bi we re binim, kêfxweş im. Ez wek Serokê Giştî yê KDP’ê, silavên germ û dilsoz ên partiya xwe û hemû hevalên xwe ji we re radigihînim.
Berî her tiştî, ez kongreya we pîroz dikim û hêvî dikim ku ev kongre bibe destpêka qonaxeke nû ya serkeftinê, xizmetê û pêşketinê ji bo gelê me.
Xwişk û birayên hêja!
Gelê Kurd di dîroka xwe de gelek zehmetî, êş û azar dîtine. Lê gelê me bi hêza xwe, baweriya xwe û hêviya xwe her tim li ser piyan maye. Em dizanin ku rêya pêşketinê tenê bi yekîtiyê, diyalogê, hevkariyê û rêzgirtina ji hev re gengaz dibe.
Îro, erkê me yê herî mezin ew e ku ji bo aşitî, aramî, edalet û jiyaneke bi rûmet ji bo hemû gelan bixebitin.
Em bawer dikin ku cudahiyên fikrî û siyasî divê bibin sedema dewlemendiya civakê, ne sedema nakokî û dûrbûnê. Divê em hev guhdar bikin, hev fam bikin û ji bo berjewendiya gelê xwe bi hev re bixebitin.
Birêzan!
Têkiliyên di navbera hêzên siyasî de divê li ser bingeha rêzgirtinê, baweriyê û hevfêmkirinê bên avakirin. Em dikarin di hin mijaran de xwedî nêrînên cuda bin, lê mafê gelê me yê jiyaneke bi aşitî, ewlehî û rûmet divê her tim armanca me ya hevpar be.
Em dixwazin ku nifşên nû di hawîrdoreke aram de mezin bibin; zarokên me xwedî perwerdehiya baş bin; ciwanên me xwedî derfetên kar û pêşketinê bin; û hemû gelên vê herêmê bi hev re di aşitî û biratiyê de bijîn.
Em ji bo civakeke ku tê de dadmendî, maf, azadî û wekhevî bên parastin, divê bi dilsozî bixebitin.
Xwişk û birayên delal!
Ez dixwazim careke din tekez bikim ku yekîtiya gelê me, parastina nirxên me yên hevpar û xebata ji bo pêşerojeke baş, berpirsiyariyeke mezin li ser milê me hemûyan e.
Em hêvî dikin ku kongreya HÛDA PAR’ê bi serkeftin bi dawî bibe û biryarên ku tên girtin bibe sedema xizmeta zêdetir ji bo gel û welatê me.
Bila em bi hev re ji bo aşitiyê bixebitin.
Bila em bi hev re ji bo edaletê rawestin.
Bila em bi hev re ji bo rûmeta gelê xwe û pêşeroja zarokên xwe gavekê pêş ve bavêjin.
Di dawiya axaftina xwe de, ez careke din kongreya we pîroz dikim, ji we hemûyan re serkeftin, tenduristî û serfirazî dixwazim..
