Yekitiya Neteweyî Destpêka Serkeftinê Ye

Rexistina  DAIŞ(Dewleta Îslamî ya Iraqe û Şamê) a terorîst  bi êrîşekê  bajarê  Mûsilê  bidestxist.  Hêzên leşkeri  yên  Hikûmeta  Bexdayê bêyî  ku liberxwe bidin,reviyan û Mûsil kete deste DAİŞ ê. DAİŞ beriya çend rojan li Başûrê rojavayê Kurdistanê(Rojava) gelek zarok û jinên Kurdan li Serêkaniyê bi awayekî  hovane qetil kiribû.Bi vê êrîşa  DAİŞ ê ya li ser Mûsilê  ve jî, bi sedhezaran mirov mecbûr mane ku mal û cihên xwe bihêlin û bi rêyan bikevin.Eve jî  dibe sedemê mexdûriyet û trajediyeke nuh .

ÊrÎşa DAİŞ ê îspat kiri ye ku, dujminên miletê Kurd ji bo destkeftinên Dewleta Başûrê Kurdistanê û hemû destkeftinên  perçeyên din de têk bidin, bi plan û  stratejiyên kûr tev digerin. Ji ber wê yekê jî parastin,xwedî  lê derketin û yekgirtina  destkeftiyên  Kurd û Kurdistanê erkekî me yê giştî yê neteweyî ye. Û careke din jî îspat bûye ku  ew propaganda, gotin û kiryarên ku zerarê digihîne yekitiya neteweyî , ne li gor berjewendiyê miletê me ye.

Êrîşa DAİŞ ê ji aliyekî din ve , derfeteke  nuh  aniye holê. Weki  ku em dizanin, bi peyda  buna  firsendeke dîrokî û bi xêra  yekitiya  neteweyî  di  sala 1991 ê de piraniya axa Başûr hatibû rizgar kirin. Û her bi xêra  vê yekitiya neteweyî  Dewleta Federal  ya Herêma  Kurdistanê hatibû  damezrandin. Îro jî piştî DAİŞ ê Mûsil bidestxist, careke din bi yekgirtin û hemahengiya hemû hêzên Kurdistanê û ya miletê Kurd, li başûrê welatê me ew axa li derveyî  Herêma Kurdistanê mabû  ji aliye hêzên Pêşmergeyên Kurdistanê ve hatiye kontrol kirin. Kerkûk, Xaneqîn, dor û bera Mûsilê û hemû axa Başûrê Kurdistanê nuha di bin desthilatdariya  Hezen  Peşmergeyên  Hukûmeta  Herêma  Kurdistanê de ne. Eve ji bo her çar perçeyên Kurdistanê re destkeftineke dîrokî  ye.Em hêvî dikin ku, gele me yê li ew deverên derveyî  Herêma Kurdistanê mane,   li gorî madeya 140 ê ,mafê xwe yê beşdarbûna  Herêma Kurdistanê   bi referandûmekê pêk bînin.

Helbete ku ev rewşa nuh dê gelek plan û stratejiyên herêmî  têk bide.Dikare li Iraqê rêya damezrandina dewleteke   sunne û  dewleteke    şîe veke. Herweha  dikare  damezrandina  dewleta  konfederal an serbixwe ya Başûrê Kurdistanê jî  bi leztir bike. Dikare ev hewldana  DAİŞ ê rewşê hîn aloztir jî bike ku xeteriyekê bixe ser destkeftinên Dewleta  Başûrê Kurdistanê .Her çend Hezên pêşmergeyên Hukûmeta Kurdistanê  bi baweriyeke mezin  dê nehêlin ev destkeftianana  bikevin  bin xeteriyekê jî,    divê ev aliyên  meseleyê jî  neyên  piştguh kirin . Ev hewla DAİŞ ê helbete  ku   bi piştgiriyeke  herêmî  û navdewletî  hatiye kirin. Ji ber wê yeke   dikare  tesîra xwe li ser rewşa  Suriyê    jî û ya  Rojavayê Kurdistanê     bike. Dikare tesîreke giştî   li ser çareserkirina pirsa Kurdistanê bike.

 sebep, plan  û armancên   çi dibe bila  bibe,  divê  beriya her tiştî  rojeva  Kurdan ya esasî  parastin û xurt  kirina  yekitiya  xwe ya neteweyî  be. Divê  Kurd û Kurdistaniyên  her çar perçan  bi vê yekitiya neteweyî  amadeyiya  van îhtimalana gişa bikin .Divê Kurdên herçar perçeyên Kurdistanê, bêyî  qed û şerd  piştgiriyê bidine Dewleta Başûrê Kurdistanê ku em bikaribin di vî perçeyê welatê  xwe de zûtirîn wext  dewleteke  bi  Kerkûkê  û bi hemû  axa  xwe ve azad û  konfederal an jî  serbixwe  bibinin. Divê li Rojavayê Kurdistanê zûtirîn wext  Desteya  Bilind a Kurd  ,li ser esasê  Mutabaqata  Hewlêrê  yekitiya neteweyî  li temama  Rojavayê  Kurdistanê  pêk bîne.Divê  hemû  miletê Kurd , li her çar perçeyên  Kurdistanê  bi  hişyariyeke  mezin , rê nedine  planên dijminên miletê Kurd.

Roj roja yekitiya neteweyî ye, roja piştgirtina birayên me yên Başûrê Kurdistanê ye.Roj roja yekitiya  navxweyî  ya birayên me yên Rojavayê  ye.Roj roja xurtkirin û geşkirina hestên Kurdistanî  ye.Serkeftina Başûr,destpêka serkeftina hemû miletê Kurd e. Bakur,Rojava,Rojhilat û Başûr  bi yek deng û yek helwest  dive hemû planên dijminan pûç bikin .Yekitiya neteweyî  destpêka serkeftinê ye, destpêka azadiyê, destpêka mafê çarenûsiya miletê Kurd e.13.06.2014

Bijî Yekitiya  Hêzên  Neteweyî  

Bijî mafê çarenûsiya Miletê Kurd

Bijî Kurdistan

Komîteya Rêveberiyê ya Hewldana Partiyeke Kurdistanî

Nerîna min :