Di dîroka 70 salî ya xelatên World Press Photo de, cara yekem e ku wênekêşekî Kurd ji ber xebata xwe ya li ser çîroka kolberên Kurd hêjayî vê xelata bi prestîj hat dîtin. Xelatgir wênegirê Kurd Îbrahîm Alipur bû.
Xebata Îbrahîm Alipur di Xelatên Wêneyên Çapemeniyê yên Cîhanê de, ku li gorî kategoriyên cuda hatine dabeşkirin, di kategoriya “projeya demdirêj” de xelat wergirt.
Alîpûr di xebata xwe ya heşt salan de jiyana dijwar a kolberan li Rojhilat û Herêma Kurdistanê vedihewîne.
Di vê çîroka dîtbarî de ku ji 30 wêneyên Îbrahîm Alipur pêk tê, xetere û têkoşîna jiyanê ya kolberên li ser sînor tê eşkerekirin.
Alipur got ku di pêşangehê de bi tevahî 100 wêne dê hebin û 10 çarçove ji projeya wî bi xwe dê werin hilbijartin û ji bo pêşandanê werin pêşkêş kirin.
Tê payîn ku îsal nêzîkî 4 milyon kes pêşangehê ziyaret bikin. Par hejmara mêvanan wekî 3 milyon û 500 hezar hatibû tomarkirin.
Alipur got, “Ew xelat wergirt ji ber ku bi vê projeya dijwar derketiye pêş, ku çîroka wê kêm tê zanîn, kêm tê vegotin û pir girîng e.”
World Press Photo û Xelata Pulitzer wekî du xelatên herî bi prestîj ên wênekêşiya çapemeniyê li cîhanê têne hesibandin.
Xelata World Press Photo ji aliyê Weqfa Wêneya Çapemeniyê ya Navneteweyî ve tê pêşkêş kirin, ku di sala 1955an de li Amsterdam, Holanda hatiye damezrandin.
Malpera World Press Photo Award Îbrahîm Alipur bi van gotinan da nasîn:
“Alipur wênekêşekî ji herêma Kurdistana Îranê ye. Karê Alipur li ser çîrokbêjiyê bi rêya wênekêşiyê disekine, mijarên civakî û siyasî di bin şert û mercên dijwar de vedikole. Ew wênekêşiyê wekî amûrek bihêz dibîne da ku bandorê li temaşevanan bike, nemaze li herêmên mîna Îranê ku hikûmet lê zordar in.”
