Vatinîya hêzên demokratîk û neteweyî yên Kurd, ne ew e ku, ew, êş û jana gelê Kurd zêde bikin…

Ji roja ku partiya AKP’ê pakêta xwe ya ji bo guhertinên di qanûna bingehîn de pîşkêşi parlamentoya Türkîyê kir û vir de, ango ji dawîya meha adarê heta îro, gengeşiya di derbarê piştgirî an jî li dij-derketina van pêşnîyaran de, qet nesekinîye. Tiştê herî baş ew e ku, ev gengeşî, ne tenhê di meclisê de an jî di navbêna komikek kesên siyasî/rewşenbîr de çêbûye/çêdibe, berewajê wê, bûye mijara hemû beşên civakê.

Nûnerên hêzên statukaparêz yên nijadperest, di meclîsa Tirkî’de, bi hawara “welat perçe dibe, dewlata me têk diçe” û bi yekdengî, dijî van pêşniyaran derketin. Dezgehên sîstemê yên kemalîst, ji bo ku pêş li ber vê pakêtê û li ber pêşveçûnê bigrin, bi hemû hêz û awayên xwe xebat kirin û hîn jî têdikoşin. Îro, ji alî piranîya civatê û hemû hêzên demokratîk ve hatîye fêhmkirin ku ev şer, di navbêna parazgêrên statükoyê û hêzên guherînan dixwzin e. Bi gotinekî din, ji hêlekê ve hêzên kemalîst/nijadperest dixwazin statükoyê biparêzin û sîstemê weke xwe bihêlin; ji hêla din jî AKP, ku li Tirkîyê partîya herî nêzi demokrasîyê ye û hêzên demokratîk, guherînan û pêşveçûnê dixwazin.

Di vê babetê de pirsa herî girin ev e ku, partîya DTP/BDP, him di meclîsê de û mîna partîyên kemalîst/nijadperest, li dijî vê pakêtê derket; û him jî niha biryar stendîyê ku, wê referandûmê boykot bike. PKK, gefan li welatparêz, rewşenbîr û rêxistinên Kurd, yên ku pêşketinan û pêwistîya erê’kirina referandûmê diparêzin, dike.

Ya herî balkêş ew e ku, tu ciwanmêrek ji PKK/BDP derneketîye û negotîye “e vê maddeya pakêtê, ji ya berê xerabtir an jî paşverûtir e”. PKK, vê helwesta xwe ya bi kemalist û nijadperestên Tirkan re hevbeşe, bi gotinên neteweyî neqiş dike û dixwaze gelê Kurd bixapîne. Ew, ji tirsa xelkê newêrîbûn ku bêjin “em ê di referandumê de bêjin NA!”. Xelk dê bigota, “vaye bloka kemalîst û nijadperest jî dibêjin na, ma ferqa we çiye?”. Ji ber wê jî ew, rîya boykotkirinê hilbijartin. Lê xelk baş têdighêje ku, erê’kirina referandumê, helwestek li hember hêzên kemalîst/nijadperest û generalên 12’yê îlonê ye! Li dij derketin jî, ji xîzmeta sîstema kemalîst e. 

Bêgûman plan û armancên AKP’ê ji yên me gelekî cûda nin. Ne ev pakêt dê pirsa Kurd çareser bike û ne AKP’yê jî weke me difikire. AKP, ji bo berdewamîya deshilata xwe reforman çêdike. Lê her reformekî jî, dibe sedema vekirina qulekî di sîstema kemalîst de. Û her wiha, her qulek jî, rê li ber tîrêjeke azadî û demoqrasîyê, vedike.

EU û bi taybetî USA jî piştgirîya vê pakêtê dikin û li Tirkîyê guherînan dixwazin. Serokê Kurdistana Başûr Berêz Mesûd Barzanî jî, di hevpeyvîna xwe ya bi Amberin Zaman re wiha gotibû: “Desthilata îro ya li Tirkîyê, guherinên gelekî mezin li Tirkîyê pêkanîye. Berî her tiştî, nêrîna Tirkîyeyê hate guhertin. Ger em zihnîyet û boçûnênTirkîyê yên klasîk bînin ber çavên xwe, tiştên ku AKP kir û dike, birastî jî mêrxasî ye. Tevgera xwe bi wêrekî kirin. Mitewazi be jî, gavên ku di derbarê ‘vebûna demokratîk’ de avêtin, tu carî ne biçûk in. (…) Him li Tirkîyê û him jî di nav PKK’e de, mirovên ku ji şer xwedî dibin henin.”

Wek tê zanîn, li Dörtyolê, tirêmbîlekî polîsan rastî êrîşekî çekdarî hat û 4 polîs hatin kuştin. PKK’yê yekser li vê kirina xwedî derket. Lê şika hêzên ewlekarîya dewletê heye ku, li pişt vê kirinê, Ergenekon û JİTEM heye. Ji xwe dest bi kirinên şîddetê û geşkirina terora kolanan, bala her kesî kişandiyê. Pêşiya dabeyên eskerî yên ‘12 adar’ê û ‘12 îlon’ê jî eynî metod hatibûn xebitandin. Tu aqilekî selîm nikare bêje ku ev şîddet û kirinên han baş e. Ji xeynî kesên kêmaqil, sûtal û parazîtên fikrê!…

Şîddet û geşkirina şer, ne ji berjewendîya gelê Kurd û etnîsîtetên din re ye, û ne jî ji bo çareserkirina pirsa Kurd xîzmetê dike. Vatinîya hêzên demokratîk û neteweyî yên Kurd, ne ew e ku, ew, êş û jana gelê Kurd zêde bikin; berewajîya wê, divê ew, ji bo kêmkirina êşên vî gelê belengaz têbikoşin û jiyanek hîn xweştir ava bikin.

Cemil Demircan

Nêrînek

  1. Min nizanibû kak Demîrcan bi Kurdî dizane, biborin. Kurdiya wî gelek xurt e. Xwezî di malpera xwe de jî bi Kurdî binivîsiya. Shash nebim nivîskarê malpera Shikrî Xoce ye (Nasname). Carnan mirov ji nivîskarên Bakur tênagihê. Bêî Tirkî nikarin, nakin.

Bersiv :

Nêrîna te
Nav: