Konsolxaneya Fransî Ferhenga Mîr Celadet Bedirxan nasand
Li roja 24.01.2010 hola çandî ya Navenda Çandî ya Fransî ya Konsolxaneya Fransa li Hewlêr ferhenga Mîr Celadet Ali Bedirxan a bi Kurdî – Kurdî û berî 60 salan hatiyî amade kirin hate nasandin.
Li semînera nasandina ferhenga Kurdî-Kurdî a Mîr Celadet Ali Bedirxan de Dr Fredrik Tissot Konsolê Giştî Fransî yê li Hewlêr, Amelie Banzet Birêvebira Navenda Rewşenbîrî ya Fransî, Sînemxan Celadet Ali Bedirxan, Dr Kemal Mezher, Abdullah Keskîn Birêvebirê Weşanxaneya Avesta û Ferhad Ewnî Serokê Sendika Rojnamevanên Kurdistanê û çendîn rewşenbîr û siyasetmedarên Kurdistanê amade bûn.
Di destpêka semînera nasandina ferhengê de Amelie Banzet Birêvebira Navenda Rewşenbîrî ya Fransî bi xêrhatina mîhvanan kir û got: Ji bo me nasandina vê Ferhengê şerefeke mezine û em gelek dilxweşin ku îro Sînemxan Celadet Ali Bedirxan jî li vir, li gel me di nasandina vê ferhengê de amadeye.
Paşê Dr Fredrick Tissot Konsolê Giştî yê Fransî li Hewlêr axaftinek kir û destpêka axaftina xwe de xêr hatina mîhvanan kir û got: Em wekî Konsolxaneya Fransî armanca me ya bi nasandina Ferhenga Mîr Celadet Ali Bedirxan ewe ku em balê bikşînin li ser pêwendiya kevin a Kurd û Fransî û her wiha pêwendiya van her du gelan xurttir bikin. Her wiha Dr Tissot dirêjiya axaftina xwe de balkişand li ser berhemên Bedirxaniyan yên Fransî û Kurdî û rola Bedirxaniyan di pêwendiya Kurd û Fransî de bi bilind nirxand.
Piştî axaftina Dr Fredrick Tissot Konsolê Giştî yê Fransa li Hewlêr, Sînemxan Celadet Ali Bedirxan jî di derbarê parastina ferhengê û sedemên ku heta niha çap nekirina vê Ferhengê de hinek zanyarî pêşkêşî beşdarvanan kir û balkişand li ser dema amadekirin û naveroka ferhengê. Bedirxan got: Eve nêzîkî 60 sale ev ferheng hatiye amade kirin, Rewşen Bedirxan li salên 1970 an de ji bo çapkirinê şandibû Akademiya Kurdî ya Bexda, lê mixabin piştî çendîn salan, ez û xwedê jê razî hevjînê xwe Selah Sadallah em çûne Bexdayê da ku rewşa ferhengê bipirsin. Lê mixabin me dît ku ferheng li wir li bin tozê de maye û avêtine wê erdê. Paşê me ferhengê anî û li cem xwe parast û piştî çendîn salan jî bi alikariya birêz Mam Celal Talebanî Serok Komarê Iraqa Federal û hevjîna wî xanima yekema Iraqê Hêro Îbrahîm Ehmed me li Stenbolê da çapkirin. Her wiha Bedirxan bi vê helkeftê spasiya Mam Celal Talebanî û Xanim Hêro Îbrahîm Ehmed û birêz Nêçîrvan Barzanî Serok Wezîrê Berê yê Hikûmeta Herêma Kurdistanê kir ku bi piştgiriya wî 100 saliya Rewşen Bedirxan hatibû saz kirin.
Her wiha piştî axaftina Bedirxan, Dr Kemal Ehmed, Abdullah Keskîn û Hemîd Bedirxan jî axaftinek kir û piştî axaftina wan rêwresma nasandina Ferhenga Mîr Celadet Ali Bedirxan bi dawî hat.
