Li gora nûçeya Rûdawê, serokwezîrê Kurdistanê Nêçîrvan Barzanî bi vî awayî girîngî û pêdiviya mana hêzên Amerîkayê li Iraq û Kurdistanê tîne ziman.
Serokwezîrê Herêma Kurdistanê Nêçîrvan Barzanî dibêje hêj DAIŞ li Iraqê maye ji ber vê yekê pêwîst e ji bo alîkariyê bimînin.
DAIŞ li Iraqê wek rêxistineke yekgirtî û qayîm nemaye, şaneyên wê ji hev qut bûne, lê tevgera wê jî li hinek deveran maye. Ev nexşe cihê şaneyên nivistî û endamên DAIŞê pêşan dide.
Li navçeyên Çiyayê Hemrîn, bakurê rojavayê parêzgeha Diyale û bakurê rojhilatê Selahedîn tevgereke ne normal a DAIŞê heye.
Li navçeyên başûrê rojavayê parêzgeha Kerkûkê, nêzîkê Hewîce, Riyaz, Reşad, Ebasî û çend deverên din jî heye. Tevgera DAIŞê li başûrê parêzgeha Neynewa zêde ye û metirsiya DAIŞê li hinek navçeyên parêzgeha Enbar zêde bûye, bi awayekî xuya li bakurê wê parêzgehê.
Herî zêde li van cihan tevgera DAIŞê heye
-Navçeya Çiyayê Hemrîn
-Bakurê rojavayê parêzgeha Diyale
-Bakurê rojhilatê Selahedîn
-Başûrê rojavayê parêzgeha Kerkûkê
-Hewîce, Riyaz, Reşad û Ebasî
-Başûrê parêzgeha Neynewa
-Parêzgeha Enbar
Wezareta Berevaniyê ya Amerîkayê (Pentagon) bi fermî hejmara hêzên leşkerî yên welatê xwe li Iraqê wek nêzîkî 5 hezar û 200 rawêjkarên serbazî ragihandiye, herçiqas hinek çavkaniyên medya Amerîkayê behsa zêdeyî 7 hezar rawêjkarên serbazî û leşkeran dikin.
Di navbera Iraq û Amerîkayê de rêkeftina stratejîk a ewlekariyê heye ku sala 2008ê hatine îmzekirin.
Niha hinek aliyên Iraqî hene daxwaz dikin ku hêzên Amerîkayê ji Iraqê derkevin û herwiha rêkeftina ewlekariyê jî were hilweşandin.
