BBC: Li Rojava cemawerê PDKê ji PYDê zêdetir e

Televizyona BBC a Brîtanîyaê serdana Rojavayê Kurdistanê kir û derbarê rewşa wê derê de raportek belav kir. Di raportê de tê gotin ku tevî serdestiya serbazî ya PYDê, lê cemawerê PDKê li wê beşa Kurdistanê zêdetir e.

Peyamnêrê navdar ê televizyona BBC Jim Muir di serdanekê de bo Rojavayê Kurdistanê, behsa jiyan û rewşa wê derê dike û balê dikşîne ser şerê di navbera PYD û grûbên Îslamî de. Mawer wiha dibêje:

          Berpirsên YPGê, baskê leşkerî yê PYDê, dibêjin ku heta niha zêdeyî 500 şervanên wan di şerê dijî çekdarên Dewleta Îslamî û Cepheya El-Nusra de hatine kuştin.

Aldar Xelîl ku berpirsekî payebilind ê PYDê ye ji rojnamevanê BBC re wiha dibêje:

          Dibe ku cudahiya me siyasî digel aliyên din ên mixalefetê hebe, lê pirsgirêka me ya serekî digel grûba wek Dewleta Îslamî û Cepheya El-Nusra ye ku ser bi El-Qaîdeyê ve ne, ew dixwazin Sûriyê bikin bingehe xwe yê serekî û em li dijî wan radiwestin, ji ber eger heye wan biryareke stratejîk dabe ku şerê me bikin û navçeyê kontrol bikin.

Peyamnêrê BBC Jim Muir, derbarê peywendiyên navbera rijêma Esed û PYDê de dibêje:

          Dema li nav bajarê Qamişlo digerî, gumanên hebûna têkeliyên navbera rijêmê û PYDê zêde dibin. Wêneyekî mezin ê serokê Sûriyê Beşar Esed li ser Fermangeha Posteya Qamişloyê ye. Binkeyekî zilamên rejîmê li navenda bajêr heye û derdora firokexaneyê jî kontrol kirine. Peykerekî Hafiz Esed ê bavê serokê Sûriyê, li meydaneke qerabalix e û yek ji wan peykerên kêm ên Esed e ku ji destpêka raperînê ve nehatiye destkarî kirin.

          Efserên polîsên nehênî yên Sûriyê (Muxaberat) ku çakêtên reş li wan e, bi awayekî normal di bazgehên asayîşa PYDê re derbas dibin. Çendîn nîşan û belge li ser peywendî û hevahengiya di navbera dewleta Sûriyê û çekdarên Kurd de heye. Li hemû navçeyên Kantona Cizîrê, mamosta, karmendên nexweşxaneyan, karkerên şaredariyê û fermanberên din meaş ji hikûmeta Sûriyê werdigirin û hemû mameleyên hevwelatiyan jî bi rêya fermangehên dewletê li bajarê Hesekê tên kirin.

Peyamnêrê BBC di dawiya raporta xwe de wiha dibêje:

          Aliyên din ên siyasî, PYDê bi wê yekê tometbar dikin ku bi hêza çekdarî xwe feriz kiriye. Herçiqas karekî dijwar e raya giştî bi tevahî bizane, lê dibe ku gelek Kurd hevfikir bin li ser wêya ku hêzên PYDê meydan kontrol kirine, lê belê cemawerê Partiya Demokrata Kurdistanê (PDK) zhedetir e. (Basnews)

 

Bersiv :

Nêrîna te
Nav: