Referandum

خۆپیشانده‌رانى شارى ڕومادى هێرشیان كرده‌ سه‌ر ساڵح موتڵه‌گ

خۆپیشاندان و ناڕه‌زایی‌ سونه‌كانی‌ عێراق به‌رده‌وامه‌ و ئه‌مڕۆش له‌كاتی گه‌یشتنی بۆ شوێنی خۆپیشاندانه‌كان ژماره‌یه‌ك خۆپێشانده‌ر له‌ شاری ڕومادی به‌ هاویشتنی به‌رد هێرشیان كرده‌ سه‌ر ساڵح موتڵه‌گ جێگری سه‌رۆكى ئه‌نجوومه‌نى وه‌زیرانی عێراق و بۆ بڵاوه‌پێكردنی خۆپیشانده‌رانیش  پاسه‌وانه‌كانی موتڵه‌گ ته‌قه‌یان به‌هه‌وادا كردووه‌.

هاوكات له‌گه‌ڵ به‌رده‌وامبوونی ناڕه‌زایی و خۆپیشانده‌كان له‌ناوچه‌ سوننه‌نشینه‌كان دژ به‌ حكومه‌تی‌ ئیتیحادی‌، ئه‌مڕۆ خۆپیشاندانێكی به‌رفراوان له‌سه‌ر ڕێگه‌ی خێرای نێوده‌وڵه‌تی له‌نزیك شاری ڕومادی له‌ پارێزگای ئه‌نبار سازكران و له‌گه‌ڵ گه‌یشتنی ساڵح موتڵه‌گ جێگری سه‌رۆكى ئه‌نجوومه‌نى وه‌زیرانی عێراق بۆ شوێنی خۆپێشاندانه‌كه‌، ژماره‌یه‌ك خۆپێشانده‌ر به‌ هاوێشتنى به‌رد هێرشیان كرده‌ موتڵه‌گ، كه‌ ئه‌وه‌ش پاسه‌وانه‌كانی ناچاركرد ته‌قه‌ به‌هه‌وادا بكه‌ن بۆ بڵاوه‌پێكردنی خۆپیشانده‌ران و دابینكردنی ڕێگه‌یه‌كی ته‌نها تا موتڵه‌گ بتوانێت به‌ سه‌لامه‌تی شوێنی خۆپێشاندانه‌كه‌ جێبهێڵێت.

له‌ لایه‌كى دیكه‌وه‌ نوسینگه‌ى جێگرى سه‌رۆكى ئه‌نجوومه‌نى وه‌زیرانى عێراق ڕایگه‌یاند كه‌ ساڵح موتڵه‌گ له‌ كاتى ئاماده‌بوونى له‌ میانه‌ى خۆپێشاندان و ناڕه‌زایه‌تیه‌كانى ئه‌مڕۆى پارێزگارى ئه‌نبار له‌ شارى ڕومادى دووچارى هه‌وڵێكى تیرۆركردن بۆته‌وه‌ و كه‌ به‌و هۆیه‌شه‌وه‌ له‌ ئه‌نجامى ده‌ستڕێژى گوله‌ ژماره‌یه‌ك پاسه‌وان برینداربوونه‌ و به‌ گوێره‌ى هه‌ندێ له‌ سه‌رچاوه‌كانى هه‌واڵیش یه‌كێ له‌ برینداربووه‌كان ، گیانى له‌ ده‌ستداوه‌ و ئه‌مه‌ سه‌ره‌ڕاى ئه‌وه‌ى  ژماره‌یه‌ك له‌ ئۆتۆمبێلیش زه‌ره‌روزیانیان به‌ركه‌وتووه‌.

 

Back to top button