Şîrketên petrolê: Hinartina petrolê bê pere dest pê nake
Danûstandinên li ser ji nû ve destpêkirina herka petrolê berdewam dikin.
Şîrketa petrolê ya Norwêcê DNO ku yek ji şeş endamên Komeleya Pîşesaziya Petrolê ya Kurdistanê (APIKUR) ye, ragihand ku kompanyayên navdewletî yên petrolê, yên ku li ser xaka Hikûmeta Herêma Kurdistanê kar dikin, heta pirsgirêka paşxistina mûçeyên petrolê ji bo hinardekirina boriya petrolê çareser nekin, wê nikaribin dest bi hinartina petrolê bikin û ev yek bi qasî 1 milyar dolar tê çareser kirin.
DNO herwiha da zanîn ku deynê hikûmeta Herêma Kurdistanê ji firotina petrolê ya berê zêdetirî 300 milyon dolar e. APIKUR berî niha gotibû, girtina xeta boriya petrolê ya Iraq-Tirkiyê ji aliyê Enqerê ve di meha Adarê de ji dahata Iraq re bûye sedema ziyanek giştî ya 7 milyar dolarî.
Navenda Hakemê ya Navneteweyî (ICC) di meha Adarê de biryar dabû ku Enqere ji bo heyama navbera 2014 û 2018an tazmînatê bide Bexdayê. Piştî vê biryarê, Tirkiyê şandina petrolê ya ji Başûrê Kurdistanê rawestandibû. Danûstandinên di derbarê herk û şandina petrolê de berdewam dikin.
Li gor nûçeya ajansa Reutersê, rayedarên hikûmeta Iraqê cara yekem bi nûnerên APIKURê re civiyan û li ser vê mijarê gotûbêj kirin. Endamên din ên APIKUR General Energy, Gulf Keystone Petroleum, Shamaran Petroleum, HKN Energy Ltd û Hunt Oil bi qasî nîvê petrola Kurdistanê derdixin.
Di Nîsana borî de, hikûmeta federal a Iraqê û hikûmeta Herêma Kurdistanê li ser hinartina petrolê lihevkirinek pêşîn pêk anîbûn û wê daxwaz ji Tirkiyê bikin ku derkirina petrolê bi rêya boriyên xwe berdewam bike.
