Şerek dijwar di navbera du welatên cîran de destpêkir…!
Şevîdin di navbera Pakistan û Afganistanê de şerên dijwar qewimîn. Wezîrê Ragihandinê yê Pakistanê, Attaullah Tarar, îdia kir ku di operasyonan de 133 Afganî hatine kuştin û zêdetirî 200 kes jî birîndar bûne. Cîgirê Berdevkê Hikûmeta Afganistanê Hamdullah Fitrat diyar kir ku 55 leşkerên Pakistanî di operasyonên tolhildanê de hatine kuştin. Wezareta Parastinê ya Pakistanê daxûyaniyek ragihan û got: “Sebra me xilas bûye; em bi Afganistanê re ketine şerekî vekirî.”
Şer di navbera Pakistan û Afganistanê de li ser Xeta Durand, ku wekî sînorê di navbera her du welatan de tê hesibandin, berdewam dike.
Di pevçûnên şevê de, balafirên şer ên Hêza Hewayî ya Pakistanê li ser Kabûl, paytexta Afganistanê, û bajarê Qendaharê êrîşên hewayî pêk anîn. Her wiha hat ragihandin ku di çarçoveya êrîşan de depoyek cebilxaneyê li parêzgeha Nangarharê hatiye wêrankirin.
Wezîrê Ragihandinê yê Pakistanê, Attaullah Tarar, di daxuyaniyekê de li ser platforma medyaya civakî ya şîrketa X a Amerîkî îdia kir ku di operasyonan de li aliyê Afganistanê 133 kes hatine kuştin û zêdetirî 200 kes jî birîndar bûne. Tarar diyar kir ku li Kabûl, Paktiya û Qendaharê hin hedef hatine lêdan, ev yek nîşan dide ku hejmara miriyan dikare zêde bibe.
Tarar îdia kir ku di operasyonan de 27 baregeh û 9 xal hatine wêrankirin, û diyar kir ku gelek cih, di nav de du baregehên korpus û sê baregehên lîwayan, û her wiha zêdetirî 80 wesayît û çek hatine wêrankirin.
Wezîrê Parastinê yê Pakistanê Khawaja Muhammad Asif, di postek li ser X de got, “Piştî vekişîna hêzên NATOyê, dihat hêvîkirin ku li Afganistanê aştî çêbibe û Talîban dê li ser berjewendiyên gelê Afganistanê û aştiya li herêmê bisekine. Lêbelê, Talîbanê Afganistan veguherandiye koloniyeke Hindistanê.”
Asif, diyar kir ku Pakistan ji bo “rewşê normal bihêle” dîplomasiyê dimeşand, û destnîşan kir ku “sebra wan xilas bûye.” û got, “Niha di navbera me de şerek vekirî heye.”
Wezîrê Karên Hundir ê Pakistanê Mohsen Naqvi jî di postek li ser X de êrîşên Afganistanê şermezar kir. Li gorî Tolo News, Cîgirê Berdevkê Hikûmeta Afganistanê Hamdullah Fitrat îdîa kir ku 55 leşkerên Pakistanî di operasyonên tolhildanê de hatine kuştin, û cenazeyên 23 leşkeran û gelek çek hatine desteserkirin.
Wezareta Ragihandinê ya Pakistanê ragihand ku piştî êrîşên bombeyî yên vê dawiyê li welêt, wan heft cih li ser sînorê xwe yê bi Afganistanê re hedef girtine, ku ew wekî “kampên terorîstan” bi nav kirine. Wezareta Parastinê ya Afganistanê diyar kir ku di wextê guncaw de “bersiveke guncaw û pîvandî” dê ji Pakistanê re were dayîn. Heyva Sor a Afganistanê diyar kir ku di encama êrîşa Pakistanê de 18 kes mirine û gelekên din jî birîndar bûne. Wezîrê Dewletê yê Karûbarên Navxweyî yê Pakistanê, Talal Chaudhry, ragihand ku “nêzîkî 70 terorîst di êrîşên li ser sînorê Afganistanê de hatine bêbandorkirin.”
