Ka binerin…!

Di van demên dawî de, metirsiya şerê kurd-kurd zêde dibe.

Her hêlek hêla din bi nokerî û xerabiyê tawanbar dike.

Em nakevin vê mesela kî rast dibêje an jî kî nerast dibêje.

Lê pirsa herî zor kî bêca vê nelihevkirinê dide?

Di vê dema dawî da, ku hertişt beha bûye, pariyê nên li milet bûye efiyon, jibilî ku tacir û bazirgan ji van partiyan in, eger nepartî bi xwe bin, ev rewş wisa aloz û nexweş dibe. PYD, ku ya rast PKKê ye, hîn jî di hemî waran de, bi çavê Bakur li mesela Sûriya dinêre, wate her gavek bête kirin ne dibin sîbera wan de, an jî bi navê wan be, ew kar ji Turkiya tê û Erdogan li dûv e(Em bi hêvî ev danûstendinên bi  rêzdar Ocelan re bigihin dawiyê, daku em ji aqiliyeta (yên ne bi min re, dijminê min e), gundîtî û eşîrtiyê xelas bibin.

Her wisa ji hêla din ve, her tiştek ji hêla PYD bibe, bi şêweyekî wek ew dixwazin bibin. Ev hişmendî me berbi kambaxî û xerabiyê ve dibe. Bi min pir seyr e, ku di xuleya xelaskirina leşkerên PYD de, serokê partiya Elîko, amade bibe û roja din, êrîşa nivîsgeha wan bikin, kesên bêguneh birevînin û Elîko bi nokerê Sûrî û Turkî li qelem bidin??!!!

Ji bilî wê jî, ta kengî wê ev partî hemî rêzê li peyv û peymanên xwe yên li Hewlêr, Qamişlo û her deverên din bigirin??!! Bi rastî ev partî ya rast bi aqilê xwe dikenin, lê bawer dikin ku bi aqilê milet dikenin! îro wilo û sibe wekî din, ji xwe şerim bikin hun bûna henekpêkerên me û hun bûn yên herî dawî ku bawerî bi we bibe. Ev partiyên kilasîk, siyasetmedarên kilasîk û PYD digel we, di çareçewa siyaseta rêjîma Sûrî de kar dikin. Ez nabêjim hun noker in, lê ez dibêjim karê we di xizmeta rêjîmê de ye ta bi dawî.

Ev grûpên ne bi ser partiyan ve, ku ew xudanê kolanan raperînê bûn kanî? Kî ew têkbirin? kî ew siyasî, ruhî, û hêza hundurîn û germahiya wan şikand? Kî niha roj bi roj xelkên berê çalak direvîne, piştî ew bêhêz û têkbirin? Ma kî ew maf daye PYD, ku ji çalakvan li Tirbespiyê bipirse, çima wa Leptop û alavên ragehandinê wergirtine? Ma ev jî mîtê tirkan in? Çima bo we helal e, hun bi herkesekî re bidin û bistînin, lê bo yê din heram e? Bêguman Ev partiyên din, ji serhildana 12 avdarê û ta niha jî çu karê pîroz nekirine, belê wan jî di têkbirina grûpên xortan de, roleke pîs û xerab lîstin û di ser serê wan re, partiya Yekîtiya nedemoqrat.

Ev şêwe karê van partiyên xwedegiravî dibêjin em bo milet dikin, dixe ber berpirsiyareke dîrokî de. Kurd dibêjin ” Giya di bin keviran de namîne “. Ev yarî û lîstikên zarokan, yên bi navê encumana kurdî û desteya bilind, divêt bête rawestan, ji ber ev encuman xizmeta kurdîtiyê nake û ev  desteya bilind, çakûçe li ser serê milet û kêre li ser stukura wan….

Ya rast an bibêjin em biser neketin û herin malên xwe, ez dizanim, ev mêranî bi we re nîne, ku hun vê bibêjin û an jî vekirî bibêjin  em evin û destê zorê maçî dikin û bibêjin milet hun xwe debar bikin. Ji xwe hun ev yên serkêş, heroj di balfiran de ne, ji welatekî bo yê din û li Hotêlên 5 stêr in.

Hêviya min ew e, stratîjiya PKK li bakûrê Kurdistanê, (ku hemî hêz ên wê demê heyî tune kirin û bêpbask hiştin û kuştin) birê ve bir, li rojavayê Kurdistanê birê ve nebe, ji ber ev dem ne ew dem e û dîrok rehmê nake.

Alternatîva vê rewşê, dubare xort xwe bikin yek, desteyeke zîrek bo xwe hilbijêrin, ku xwe û derdora xwe têbigehe û dînamîkî be û mekanîzmekê bo têkilî û serederiyê digel hundur û derve peyda bike…

 

Tengezar Marînî

Nerîna min :