Îsraîlê Tehran bombebaran kir
Îsraîlê îro sibê ragihand ku êrîşek li ser Îranê daye destpêkirin. Li Tehranê dengê teqînan hat bihîstin, li Tel Avîvê jî sîren hatin lêxistin. Êrîşan berpirsên payebilind ên Îranê hedef girtin û hate ragihandin ku Rêberê Bilind Ayetullah Elî Xamineyî birine cihekî bi ewle.
Li gorî agahiyan, li Îsraîlê dengê sîrenan hat. Wezîrê Parastinê yê Îsraîlê Îsraîl Katz ragihand ku welatê wî li dijî Îranê “êrîşa pêşîlêgir” daye destpêkirin. Hate diyarkirin ku êrîş bi du pêlan hatine kirin û hat îdîakirin ku DYA jî beşdarî operasyonê bûye.
Al Jazeera û CNN ragihandin ku DYA beşdarî êrîşan bûye, di heman demê de The New York Times nivîsand ku bi dehan balafirên Amerîkî beşdarî operasyonên li Îranê bûne. Rêveberiya DYA jî bi fermî destpêkirina êrîşan ragihand.
Kanala 12 a Îsraîlê îdia kir ku operasyon “êrîşeke hevbeş a Amerîka û Îsraîlê” bû. Hat îdiakirin ku Îsraîlê bi Amerîkayê re êrîşeke hevbeş a çar rojî plan kiribû.
Li gorî çavkaniyên herêmî, êrîş li seranserê Îranê bi du pêlan pêk hatine û nêzîkî 30 cih bûne armanc. Li gelek bajaran, di nav wan de Tehran, Qum, Xuremabad, Îsfahan, Çîtgar û Tebrîz, teqîn çêbûne. Li gorî agahiyan, kolana ku Zanîngeha Tehranê lê ye û kolana Cumhurî Îslamê, her wiha Balafirgeha Mehrabad jî hatine hedefgirtin. Hat îdîakirin ku tesîsa nukleerî ya li Îsfahanê hatiye hedefgirtin, lê ev agahî bi awayekî serbixwe nehatiye piştrastkirin. Dema ku bombebaran berdewam dikir, êrîşên sîber ên li dijî Îranê jî hatine îdiakirin, û ajansên nûçeyan ên fermî jî hatine hedefgirtin.
Karbidestekî Îranî, ji Reutersê re axivî û got ku Îran amadekariya tolhildanê dike û bersiva wan dê “berbiçav” be.
Îdiayên ku li ser medyaya civakî ya Îranê belav dibin nîşan didin ku êrîşên hewayî berpirsên payebilind ên hikûmetê hedef girtine. Her çiqas tê îdiakirin ku Serok Mesûd Pezeshkian hatiye hedefgirtin jî, lê ti daxuyaniyek fermî nehatiye dayîn. Li gorî raporên li ser Reutersê, Rêberê Bilind Ayetullah Elî Xameneyî birine herêmeke ewle. Ji ber ku alozî li herêmê bi lez zêde dibe, civaka navneteweyî pêşketinan ji nêz ve dişopîne.
