Îran 5 km derbasî nava Kurdistanê bû

01/06/2010

Piştî çar rojên topbarankirin û bombbarankirinê, hêzên supayê Îranê pênc kîlometreyan derbasî nava xaka herêma kurdistanê bûn û çend bingehên leşkerî jî ji xwe re danîn. Di evan çar rojên derbasbûyî de, hêzên supayê Îranê deverên çiyayê Qendîl, Çoman, Hacî Omeran û Sîdekan topbaran kirin û nêzîkî 220 xêzanên (ayleyên) evan deveran, niha derbider û aware ne. Hêzên supayê Îranê niha du bingehên leşkerî, yek li devera Wêze û yek jî li devera Kanîreşe yên girêdayî qezaya Çoman, ji xwe re danîne.

Li angora bêjedana jêderekî asayişê jî – ku wek hercar nexwezt navê xwe aşkira bike – weha dihê xuyakirin, ku dê ev hêzên han li evan deveran bimînin û jê nederkevin.

Li angora nûçeyên ku ji deverên sînorî dihên, leşkerên Îranê gulleyan bi ser hemû kesan de dibarînin û êdî xelkên ewan deveran, ji malên xwe direvin û xwe li deverên hêmin û aram digirin.

Hukûmeta Îranê jî weha dide nîşandan, ku ew evan operasiyonan li dijî çekdarên PJAK a girêdayî PKK encam dide û bi behaneya hebûna evan çekdaran li nava deverên sînorî, ev operasiyon dihên encamdan.

Nûçe: PNA – Serdar Qadir /Balekayetî

01/06/2010