Di roja 08.04.2020an de li navçeya Pasûr a Amedê, di dema ku otomobîleke karkerên daristanê hildigire di rê de derbas dibe, teqînek çêbû û di vê teqînê de 5 sivîlan jiyana xwe jidest dan. Cîhê balê ye ku ev êrîşa di demeke weha bûye ku,
daxwaza ku jibo hemû girtîyên sîyasî jî bikaribin ji guhertinên Qanûna Înfazê feydê wergirin, ji alîyê gelek beşên civatê ve tê ziman.
Ev teqîna ku li Pasûrê rûdaye û bûye sebebê kuştina 5 sivîlan, careke din jî, girîngî û pêwîstîya rawestandina şerî û bidawîanîna çalakîyên çekdarî danîye ber hemû alîyên peywendidar.
Îro li hemû cîhanê mirovahî li himberî corona vîrusê di nav seferberîyeke hevbeş de ne. Jibo ku mirov li mala xwe bimînin li her welatî bang têne kirin. Di rewşeke weha de, berdewamîya şerî û çalkîyên çekdarî, nîşana wê yekê ye ku hîna jî girîngîya xeterîya corona vîrusê nehatîye fêhm kirin û hîna jî Dewleta Tirkîyeyê bi israr dixwaze pirsa Kurd û Kurdistanê li ser esasê şîyaseta şerî çareser bike.
Belê nuha dema rawestandina şerî û dawî lê anîna çalakîyên çekdarî ne. Divê hemû alîyên peywendîdar, guh bidin vî dengê ku ji wîjdanê bi milyonan mirovan bilind dibe.
Divê Dewleta Tirkîyeyê demildest dawîyê li şer û êrîşên xwe bîne û divê PKK jî demildest dawî li çalakîyên xwe yên çekdarî bîne, agirbestê îlan bike.
Aşkere ye ku, li Bakurê Kurdistanê û li Tirkîyeyê, di çareser kirina pirs û pirsgirêkan de, şer û êrîş û çalakîyên çekdarî, rê li ber rê û şêwe û amûrên sîyasî, demokratîk û sivîl digirin. Şer û çalakîyên çekdarî pirsgirêkên heyî aloztir û kûrtir dikin.
Ji ber vê rastîyê jî, çareserîya bi rêya dîyalogê û bi rê û rêbazên aştîyane di berjewendîyên gelê me de ye.Û em di wê bawerîyê de ne ku rawestandina şerî û dawîlêanîna çalakîyên çekdarî, dê bibe destpêka çareserîyeke bi vî rengî..
Hemû îmkanên aborî yên ku jibo şerî têne xerc kirin, divê li dijî xeterîya Corona Virüsê bêne bikaranîn.
11.04.2020
PAK (Partîya Azadîya Kurdistanê)
PSK (Partîya Sosyalîst a Kurdistan)
