Ciwanên kurdên Sûriyê li derve (ASKYA)

Kongira Ciwanên Kurdên Sûriyê li Derve hat sazkirin ji ber têgihiştina bi girîngiya serdema me û pêdiviya encamdan û yekxistina kedan, bi armanca piştevanî û alîkariya şoreşa sûrî ji hemû aliyan ve û alîkariya çalak ji bo serketina wê, li nik pêşkêşkirin û pejirandina projeyên hevparane di dema dirêjxayen de bo xizmetkirina armanc û awatên hevbeş piştî têkçûna dîktatoriyê, ango avakirina Sûriyaya nû li ser hîmê sîstemeke sivîl a demokrat ku tê de rêz li maf û rûmeta mirov bê girtin.

Kombûna Ciwanên Kurdên Sûriyê li Derve (ASKYA) ya ku di kongir de hat damezirandin, ne rêxistineke xwedan pêkhateyeke pîramîdal î kevneşop e, belku toreyeke jîndar a dînamîk e ku têdikoşe bo aktîvkirina şiyanên ciwan ên kurd li her warekî derveyî welat, û ragîrkirina pêwendî, hemahengî û hevkariya di navbera wan de. Di vê kontekstê de, em ASKYA wek alternatîf bo kesekî raçav nakin, belku ew kombûneke azad e ku li ser bingeha xwezkariyê hatiye sazkirin, û rê vedike berdem sûdwergirtina ji şiyanên ciwan di hemû cûrên pêkan ên çalakî û livan de.

Wek bawerî bi prînsîpa zelalî û aşkerebûna di kar de, em radigihînin ku Kongira Ciwanên Kurdên Sûriyê li Derve desteyeke rêvebir a ASKYA hilbijart ku ji heft endaman pêk tê: Brahîm Mîro (Holenda), Ciwan Elî (Êrlenda), Ferhad Ehmê (Elmanya), Hîm Omar (Belcîka), Kawa Mihemed Emîn (Herêma Kurdistana Iraqê), Mihemed Seyda (Swêd) û Mesûd Eko (Norwêj). Di civîna yekemîn a desteya rêvebir de Ferhad Ehmê wek kordînator hat hilbijartin.

Li vir girîng e tekezkirina ku dergehên ASKYA wek toreyeke azad, vekirî ne li berdem hemû şiyanên ciwan ên kurd li derve, û herkesekî ku bixwaze beşdarî bike di pêşxistina vê çarçeweyê de û di bercestekirina armancên wê de. Di heman demê de, dê ASKYA kar bike ser pêwendî û hemahengiya li gel hemû bizavên sûrî li derve, bo hevkariya di xizmeta şoreşê û avabûna Sûriyayeke sîvîl a demokrat de.

Em herweha bi girîng dizanin ku van xalên jêrîn cardî bînin ziman:

1) ASKYA, li gor biryarên Kongira Ciwanên Kurdên Sûriyê li Derve, amadebûna xwe dide pêşandan bo pêşkêşkirina hemû rengên piştevanî û alîkariyê bo bizava ciwanên kurd li hundir, ji bo serkeftina şoreşê û bicîhatina armancên we yên berçav.

2) ASKYA dema ku rêz li taybetmendî û xweseriya biryara bizavên ciwanên kurd li hundir digire, ew di heman kat van bizavan han dide ber bi labirina kospên li berdem yekgihiştina wan di çarçeweyeke giştî de, û amade ye ku alîkarî bike bo ragihiştina bi vê armanca lezgîn.

3) ASKYA dema ku ji taybetmendiya kurdî dilive, ew di heman demê de çext dike li ser biratî û hevçarenivîsa Kurd, Ereb, Aşûrî û pêkhateyên dî yên welat, û xwe beşekî bingehîn dibîne ji bizava niştimanî ya sûrî ya giştî, û pabend dimîne bi bîrdoz û armancên şoreşê.

4) ASKYA çext dike li ser girîngiya aktîvkirina rola hebûna kurdî ya sûrî li derve daku bikaribe bi rola xwe rabibe di peydakirina destek û dilsojiya li gel şoreşa sûrî de li welatên cihê, û pêşkêşkirina rengên piştevanî û alîkariyê, bi taybetî ya diravî, bo bizava ciwanan.

5) ASKYA çext dike li ser girîngiya handana jina kurd ber bi beşdariya di bizava giştî de daku bikaribe cihê guncaw bi xwe dabigire, û ew di vê derbareyê de bang li keçên kurd dike ku xwedî li berpirsiyariya xwe derbikevin û bihêzane tevî vê bizavê bibin.

Di dawî de em bi germtirîn û dilsoztirîn silav berê xwe didin ciwanên qehreman ên me yên sûrî, û bi bilind dinirxînin têgihiştin û berpirsiyariya bilind a wan beramber bi vê serdema me ya hestiyar, dema ku ruxandina rêjîmê û serkeftina şoreşê dane pêş xwe, ji ber ku ew dergeha rasteqîn e ya avakirina Sûriyaya sivîl a demokrat, a ku awat û berjewendiyên hemû hemwelatiyên xwe misoger dike, dûr ji bîr û baweriyên wan; dewletek ku tê de çareyên guncaw bên dabînkirin bo hemû kêşeyên wê, li gel danpêdana destûrî bi hebûna gelê kurd û çareserkirina doza wî bi şêweyekî demokrat î rewa di çarçeweya yekîtiya xaka welat de.

Kombûna Ciwanên Kurdên Sûriyê li Derve (ASKYA)
13 îlon 2011

Pêwendî: [email protected]

Nerîna min :