Serokwezîr serdana Îtalya û Vatîkan dike

Serokwezîrê Herêma Kurdistanê Nêçîrvan Barzanî serdana Îtalya û Vatîkanê dike.

Sekreterê Rojnamevanî yê Serokwezîr Barzanî, Samî Ergoşî ji malpera fermî ya PDKê re ragihand, Serokwezîr Nêçîrvan Barzanî dê îro êvarê ber bi Îtalyayê ve bikeve rê.

Samî Ergoşî da zanîn, Nêçîrvan Barzanî dê bi Serokwezîrê Îtalyayê, Wezîrê Derve yê wî welatî her wiha Papayê Vatîkanê û Wezîrê Derve yê Vatîkanê re hevdîtin bike.

Li ser naveroka hevdîtinên Serokwezîr Barzanî bi rayedarên Roma û Vatîkanê re jî Ergoşî got, di civînan de dê li ser rewşa Rojhilata Navîn, şerê li djiî terorê, rewşa penaberan, pêwendiyên Herêma Kurdistanê digel Îtalya û Vatîkanê û hinek mijarên din bên axaftin.

Hat zanîn ku jibilî Nêçîrvan Barzanî, Alîkarê Serokwezîr Qubad Talebanî, Wezîrê Ewqafê Kemal Muslim, Berpirsê Fermangeha Pêwendiyên Derve Felah Mistefa û Berdevkê Hikûmetê Sefîn Dizeyî jî di şanda Herêma Kurdistanê de cîh digirin.