Serokê Amerîkayê Donald Trump, her çend îdia kir ku di danûstandinên ji bo bidawîkirina şerê di navbera Rûsya û Ukraynayê de pêşketin çêbûye jî, rexne li hedefgirtina rafineriyên dîzelê yên Rûsyayê ji aliyê Ukraynayê ve girt. Trump diyar kir ku van êrîşan zirar dane bazara dîzelê ya cîhanî û Zelensky bi wê yekê tawanbar kir ku naxwaze şer bi dawî bike.
Trump di postek li ser hesabê xwe yê Truth Social de diyar kir ku ew danûstandinan ji bo pêkanîna aştiyê di navbera Rûsya û Ukraynayê de didomîne. Wî got ku ew naxwaze gavên ku “bi bêaqilî” Rûsyayê li ser maseyê danûstandinan rake bavêje, û îdia kir ku di danûstandinan de, “pêşkeftinek mezin” çêbûye.
Trump her wiha îdia kir ku ew dikare her dem ku bixwaze peymanek aştiyê îmze bike.
Trump: Ez naxwazim Rûsya alîkariya Îranê bike
Trump îdia kir ku Rûsyayê pir hindik, an jî tiştek nekiriye, ji bo alîkariya Îranê, û ew dixwaze ku ev rewş berdewam bike.
Trump di posta xwe de diyar kir, “Ez dixwazim wê bi vî rengî bihêlim, û ez ê wê bi vî rengî bihêlim heya ku mirovên bêaqil destwerdanê nekin.”
“Zelensky naxwaze ev şer bi dawî bibe”
Trump îdia kir ku êrîşên Ukraynayê yên li ser rafineriyên dîzelê yên Rûsyayê zirareke mezin dane bazara dîzelê ya cîhanî, tevî ya li Dewletên Yekbûyî jî.
Wî îdia kir ku cotkar û karsaziyên din ji êrîşan gelek zirar dîtine, lê Rûsya bi mîlyonan bermîl dîzelê bi bihayên kêm dişîne bazarên cîhanê.
Trump Zelensky bi nexwestina bidawîkirina şer tawanbar kir û got:
“Zelensky xem nake, û bi rastî, tevî hemî pereyên ku Ewropa û Joe Bidenê sextekar di demên berê de dane wî, ew naxwaze vî şerî bi dawî bike, û dibe ku qet neke jî. Du sal berê, wî dikaribû peymanek çêtir ji ya ku niha îmze bikira.”
“Ukrayna di nav wêraniyê de ye”
Trump îdia kir ku Ukraynayê windahiyên giran kişandiye û piraniya axa xwe winda kiriye. Wî îdia kir ku nîvê nifûsa mêr a Ukraynayê birîndar an mirî ye, û xwesteka xwe ya bidawîkirina şerê di navbera Rûsya û Ukraynayê de anî ziman.
