(مەحموود محەمەد) ئەندامی مەكتەبی سیاسی پارتی دیموكراتی كوردستان: سەرۆك بارزانی ڕەزامەندە لەسەر ئەنجامدانی هەڵبژاردنەكان لە كاتی خۆیاندا
(مەحموود محەمەد) ئەندامی مەكتەبی سیاسی و بەرپرسی دەزگای رۆشنبیری و ڕاگەیاندنی پارتی دیموكراتی كوردستانشێرزاد عبدولره‌حمان
لە دیمانەیەكی ڕاشكاودا لەگەڵ ڕۆژنامەی هەولێر كە دوێنێ لەگەڵ (مەحموود محەممەد) ئەندامی مەكتەبی سیاسی و بەرپرسی دەزگای ڕۆشنبیری و ڕاگەیاندنی پارتی دیموكراتی كوردستان ساز كرا، بەڕێزی تیشكی خستە سەر پرسە هەنووكەییەكان و گۆڕەپانی سیاسی و تەنگژەی عێراق و بایەخی بەردەوامبوونی كۆبوونەوەكانی نێوان ئۆپۆزسیۆن و سەرۆك بارزانی و هەڵوێستی پارتی بەرانبەر بە ئەركەكانی ئەمڕۆ و سیاسەتی ڕاگەیاندن و چۆنیەتیی مامەڵەكردن لەگەڵ پێشهاتەكان و ئەجێندای پارتی بۆ پرسە نەتەوەییەكان.
• با لە ڕەوشی ناوخۆوە دەست پێبكەین. خوێندنەوەیەك بۆ بەیاننامەكەی دوێنێی سەرۆك بارزانی، پێت وا نییە، كە ئاماژەیەكی زۆر ڕاشكاوە لە مەترسیی ڕەوشی ئەمڕۆی عێراق و ئەنجامەكانی سیاسەتی تاكڕۆیی؟
– سەرۆك بارزانی دەمێكە ئاگاداری داوەتەوە تەواوی خەڵكی عێراق، بە كوردستانیشەوە، كە ڕێڕەوی حوكمڕانی لە عێراق، بەو ئاڕاستەیەدا ناڕوات كە خەڵكی عێراق مەبەستیان بووە، ئەوەیش ئەوە دەگەیەنێت كە خوێندنەوەی بەڕێزیان بۆ ڕەفتارەكانی دەستەڵاتبەدەستانی حكوومەتی فیدڕاڵی، واقعبینانە بووە. دەستەڵاتبەدەستانی به‌غدا ئەزمە لە دوای ئەزمەیان دروست كردووە، عێراقیان بەرەو ئەو ئاڕاستەیەی ئێستا بردووە، لە جیاتی ئەوەی تەواوی وزە و تواناكانی خۆیان، لە خزمەتكردنی خەڵكی عێراق بێت و چارەسەری قەیران و كێشەكان بكرێت. ئەم ته‌نگژه‌ی ئێستای عێراق ویست و خواستی خەڵكی عێراق نەبووە و لەو پێناوەیشدا قوربانییان نەداوە.
• خوێندنەوەی بەڕێزتان بۆ ئەو گوتارە؟
– ئەوە دڵسۆزیی جەنابی سەرۆك بارزانییە، بۆ پڕۆسەی سیاسی بۆ خەڵكی عێراق بە گشتی، چونكە خەڵكی عێراق، شایەنی ئەو ناخۆشی و كێشانە نین كە هەن.
• بەڕێزتان ئاماژەتان بۆ ئەوە كرد كە ئەو هاوكێشانەی جەنابی سەرۆك بارزانی ئاماژەی بۆ دەكرد ساڵێك لەمەوبەر، ئێستا شتەكان لەسەر ئەرزی واقعدا دەبینرێن، ئێستا هەموو شتەكان هاتنە دی، تێگەییشتنی بەڕێزتان لەم باره‌یەوە چییە؟
– ئەگەر بیرتان بێت، ساڵێك پێش ئێستا سەرۆك بارزانی وتارێكی لە بارەی چەوتیی دەستەڵات و ڕێڕەوی حوكمڕانی لە عێراقدا، كە ئەو كاتە زۆر خەڵك لە ناوەڕۆكی قسەكان بە چاكی تێنەگەییشتن یان نەیانتوانی هەزمی بكەن و وەڵامدانەوەیەكیش لەلایەن دەستەڵاتدارانی عێراق هەبوو، ئەوكات ئەوەی گوت، كە ئێستا دەیڵێت، كە ئەم ڕەفتارەی دەستەڵاتداران دەیكەن، دەبێتە هۆی ئەوەی كێشەی لێ دروست ببێت، كێشەكانیش دەبنە گرفتی گەورە لە سەرتاسەری عێراقدا، كە ئێستا كێشەكان لە سەرتاسەری عێراقدان، كەواتە ئەو هەستكردن و خوێندنەوەیەی بەڕێزیان لە خەمخۆریی خەڵكی عێراقدا بووە و پڕۆسەی سیاسی بە گشتی.
• ئایا گوتاری سیاسیی پارتی دیموكراتی كوردستان لەو قۆناغەدا چییە؟
– لە ڕاستیدا هەر لە ڕوانگەی ئەو گرفتانە و ئەوانەی كە ئێستا لە عێراق ڕوو دەدات، چ بەرانبەر بە كورد یان لایەنەكانی تر، هەروەها چ بەرانبەر بە لایەنەكانی خودی بەشدار لە هاوپەیمانیی نیشتیمانیدا دەكرێت، ئێمە وتار و ڕەفتاری خۆمان دەمێكە ڕاگەیاندووە، گوتوومانە دەبێ ڕاست بكرێتەوە و دەبێ ئەم ڕەوتە بەرەو ئاڕاستەیەكی دروست و تەندروست و مۆدێرنانە بچێتە ڕێوە و ئەم پێكەوەژیانە بەرجەستە بكرێت، هەروەها گەڕانەوە بۆ دەستوور، گەڕانەوە بۆ ڕێككەوتنەكانی نێوانمان، لەمەودوایش وتار و ڕەفتاری ئێمە، هەر ئەوە دەبێت. دەستوور مەرجەعمان دەبێت لە پڕۆسەی سیاسیی عێراقدا.
* هەر لە چوارچێوەی ناوخۆدا، هەست بە جۆرێك لە لێكگەییشتن دەكرێت لە نێوان پارتی و هێزی ئۆپۆزسیۆن، بە تایبەتی دوای دیداری سەرۆك بارزانی و سەركردەكانی ئۆپۆزیسێۆن، ئایا ئەمە سەرەتایەك نییە بۆ قۆناغێكی نوێ؟
– بێگومان، ئەگەر لە ناوخۆیشماندا لە ڕووی سیاسییەوە، كۆمەڵێك بابەت هەبێت كە هاوڕا نەبین، یان لە ڕووی سیاسییەوە، ململانێیەكی دروست بكەین، ئەوە هیچ لە بابەتەكان ناگۆڕێن، بەڵام لەسەر ئاستی عێراق و كێشەكانی، تەبایی و یەكهەڵوێستیمان زۆرترە و هاوخەباتیمان بەرانبەر بەو كێشە و گرفتانە گرنگترە و بەڵێ، ئێمە لە كوردستاندا بە یەك شێوە بیر ناكەینەوە و بە یەك شێوە كار ناكەین، بەڵام بۆ پرسە نەتەوەییەكان بەبێ شك یەكهەڵوێستین، چونكە پرسەكە تەنیا هیی سەرۆك بارزانی و پارتی نییە، پرسی هەموو نەتەوەكەیە، لەو پێناوەیشدا زۆر قوربانیی داوە، بۆیە دەبێ هەموومان هەست بە بەرپرسیارێتی بكەین، مەسەلەی ماددەی 140 و گەڕانەوەی ناوچە كوردستانییەكانی دەرەوەی ئیدارەی هەرێم، تەنیا كێشەی سەرۆك بارزانی نییە و تەنیا كێشەی پارتی دیموكراتی كوردستان و یەكێتیی نیشتمانی نییە،
كێشەی تەواوی خەڵكی كوردستانە، بەڵام پارتی دیموكراتی كوردستان لە ڕابردووەوە تا ئێستا قوربانیی بۆ داوە و قوربانیی بۆ دەدات، لە پاڵ پارتییش حزبەكانی دیكەیش، قوربانیی زۆریان بۆ ئەو پرسە نەتەوەییە داوە، ئەو ناوچانەی كە لە دەرەوەی ئیدارەی حكوومەتی هەرێمی كوردستانن، كۆمەڵێك شەهید و كێشەیان بینیوە، مەسەلەی ئەنفالیش هەر لەسەر ئەو ناوچە دابڕاوانە بوون، تەواوی كارەساتەكانی بەسەر كورددا هات پێوەندی بەو ناوچانەوە هەبووە، گرفتەكانی ئێمەیش هەر لەسەر ئەو بابەتانە بوون،
ئەگینا خۆی شتی دیكە نین، بۆ نموونە لە ساڵی 1970 حكوومەتی عێراق دانی بە كوردستانییەتی (هەولێر و سلێمانی و دهۆك)ـدا نا، بەڵام كێشەكە لەسەر كەركووك و ناوچەكانی دیكە مایەوە، كە ئەوان نەیاندەویست كەركووك و ئەوانی تر، بێنەوە سەر ئیدارەی هەرێمی كوردستان، بۆیە ئەم پرسانە پرسی گرنگی نەتەوەیین و ئێمە هەموومان، وەك یەكیش بیر نەكەینەوە، بەڵام لەم بابەتەنەدا یەكهەڵوێستین و ئەمەیش شتێكی باشە.
• زۆر لە چاودێرانی سیاسی ئەو دانیشتنەیان زۆر بە (ئیجابی) گوزارشت كرد. ئەو بۆچوونانە چەندە نزیكن لە ڕاستی؟
– لە ڕاستیدا ئەگەر بیرتان بێتەوە، لە سەرەتای ڕووداوەكانی 17ـی شوباتەوە كە ڕوویان دا، لیژنەیەك لە نێوان پارتی و یەكێتیی نیشتمانیی كوردستان و لایەنەكانی ئۆپۆزسیۆن دروست بوو، كۆمەڵێك گیروگرفت گفتوگۆیان لەسەر كرا، ئەنجامی باشی لێ كەوتەوە و كۆمەڵێك كێشە لەو نێوەندەدا چارەسەر كران، ڕێگە نەدرا هەندێ لە كێشەكان تەشەنە بكەن، ئێمەیش لەگەڵ بەردەوامبوونی گفتوگۆكاندا بووین، بەڵام بەداخەوە، گفتوگۆكانیان هەڵپەسارد، بەڵام ئێستایش لە هەوڵی گفتوگۆداین و دەمانەوێ باس لە كێشە و گرفتەكان بكەین، گفتوگۆ لەسەر بیر و بۆچوونە جیاوازەكان بكەین، دەشكرێ ئەو خاڵە هاوبەشانەی هەمانە جیایان بكەینەوە و زیاتر گفتوگۆیان لەسەر بكەین.
• داواكارییەكانی سەركردەكانی ئۆپۆزسیۆن خۆی لە چیدا دەنوێنێ و چەندە قابیلن بۆ گفتوگۆ و چارەسەر؟
– هەموو شتێك قابیلی گفتوگۆكردنە، دەكرێ هەندێ شت قەبووڵ بكرێت، هەندێك شتیش بە پێچەوانەوە قەبووڵ ناكرێت، چونكە ئێمە چەند حزبێكی جیاوازین، ئەگەر ئێمە یەك لێكدانەوەمان هەبووایە بۆ بابەتەكان دەبووینە یەك حزب، بۆیە حزبەكانی دیكە بە لێكدانەوە و ڕوانگەی جیاجیا، لە سیاسەتدا كار دەكەین، بۆیە ئێمە و هەڤاڵانی یەكێتیی نیشتمانیی كوردستان، دیالۆگ و گفتوگۆكردن بە كارێكی سەردەمیانە و مۆدێرنانە ناوزەد دەكەین.
• ئەو گفتوگۆیانە بەردەوام دەبن. ئەگەر بەردەوام بن، بە ڕای بەرێزتان چ ڕۆڵێك دەگێڕن لە دروستكردنی ماڵی كورد بە ڕووخسارێكی نوێ؟
– بێگومان بەردەوام دەبن، كۆبوونەوەی هەر سێ لایەن لەگەڵ جەنابی سەرۆك بارزانی، هەروەها كۆبوونەوەی سەرۆك بارزانی لەگەڵ یەكێتی و پارتی دیموكراتی كوردستان، تەئكید لەسەر ئەوە كراوەتەوە كە ئەو دانیشتن و گفتوگۆیانە بەردەوام بن و هەوڵبدرێت ئەو كێشانەی لە ڕوانگە جیاجیاكانەوە بیریان لێ دەكرێتەوە، بخرێنە سەر مێزی گفتوگۆكانەوە و ئومێدیش دەكەین بگەینە خاڵی هاوبەش لە نێوانمان و بۆ كاری هاوبەش زیاتر هەنگاو بنێین.
* لە هەمبەر ڕێككەوتننامەی ستراتیژیی نێوان پارتی و یەكێتی زۆر قسە دەكرێت. پاشەڕۆژی ئەم ڕێككەوتننامەیە بە دیدی بەڕێزتان بە كوێ دەگات؟
– هەر ڕێككەوتنێك لە قۆناغێكدا بووە، لە زەمەنێكی دیاریكراودا بەستراوە و دەبەسترێت، ڕێككەوتنی ستراتیژیی نێوان پارتی و یەكێتی لە كاتێكدا بەسترا كە كوردستان زۆر پێویستی بەو ڕێككەوتنە هەبوو، بۆ خاوكردنەوەی ئەو هەموو بارگرژییەی لە كوردستاندا هەبوو، گرنگییەكی تری هەبوو، كە ئەویش ئەوە بوو، ڕێگەی نەدا حەزی دوژمنانی كورد بێتە دی كە دەیانویست دەست بخەنە نێو كاروباری هەرێمی كوردستان، گرنكییەكی دیكەیش ئەوەیە بە یەكهەڵوێستی نەخشە بۆ كێشەكان دابڕێژن و بابەتەكان تاوتوو بكەن، گرنگیی ئەو ڕێككەوتنانەیش ئەوەیە تا كوردستان دەگاتە قۆناغێكی دیكە، ئەو ڕێككەوتنە بەردەوام دەبێت، مەبەستیش لە قۆناغێكی دیكە ئەوەیە، كە لەوەی ئێستا پێشكەوتووتر بێت، ئەو كاتە بیر لەوە بكرێتەوە شێوازی ڕێككەوتنەكە گۆڕانی بەسەردا بێت، یان بەرفراوانتر بێت، بەو پێیەی كە قۆناغەكە خواستی.
• سەردانی سەرۆك بارزانی بۆ دووەم جار بۆ سلێمانی چ واتایەك هەڵدەگرێت. ئایا ئەجێندای ئەو سەردانە تەنیا هەواڵپرسینی سەرۆك مام جەلال بوو؟
– چەند جارێك بەڕێز سەرۆك بارزانی كە چوو بۆ سلێمانی، سەردانی مەكتەبی سیاسیی یەكێتیی نیشتمانیی كوردستان و بەڕێز هێرۆ خانی كرد، ئەمانە هەموو لە ڕووی سیاسییەوە دەلالەتی خۆی هەیە، بەخەمەوەبوونی سەرۆك بارزانییە بەرانبەر بەو نەخۆشییە كتوپڕەی كە بەسەر سەرۆككۆمار جەنابی مام جەلالدا هات و چەند شتێكی دیكە و تەكیدكردنەوەیە لەسەر ئەو ڕێككەوتنە ستراتیژییەی نێوان پارتی و یەكێتی، بۆ خەڵكیش ڕوونتر دەكات، كە ئەوانەی پێیان وایە پارتی و یەكێتی لە كاتی بوونی ئەزمەیەك بە ئاسانی لە یەكتر جیا دەبنەوە، كە ئەمە مەحاڵە و ڕوو نادات.
* پارتی وەك حزبێكی بەرچاوی گۆڕەپانی سیاسی، چۆن خۆی بۆ پڕۆسەكانی هەڵبژاردن ئامادە دەكات؟
بەڕێزتان پێتان وایە كە ئەو پڕۆسەیە لە كاتی خۆیدا ئەنجام بدرێت؟
– وەك سیاسەت 3 پڕۆسەی هەڵبژادنمان لە پێشە، یەكێكیان ئەنجوومەنی پارێزگاكان، كە هەندێ كەس حەقی خۆیانە تیر و توانجمان لێ بدات كە بۆ ئەوەندە دوا كەت، ئێمە هیچ پاساوێكمان نییە بۆ ئەو بابەتە، ڕەخنەیەكی توند لەسەر سیستەمی دیموكراسی دەبێت كە بە هێواشی لە كوردستان بەڕێوە دەچێت، بۆیە بڕیار دراوە بە زووترین كات ئەو ئەنجوومەنە هەڵبژێردرێت، وەك ئەوەی كە نووسراوی فەرمی بۆ حكوومەت كراوە و ئەوانیش وەڵامی خۆیان لەو بارەیەوە داوەتەوە، بۆ ئەوەی ڕۆژێكی دیاریكراو دابنرێت بۆ ئەنجامدانی ئەو پڕۆسەیە.
سەبارەت بە ئەنجامدانی پڕۆسەی هەڵبژاردنی پەرلەمانی كوردستان، ئەو نووسراوەی كە لە پەرلەمان ئاڕاستەی سەرۆكی هەرێمی كوردستان كرابوو، وەڵامی داوەتەوە، با لە كاتی یاسایی خۆیدا ئەنجام بدرێت، كاتی یاسایی خۆیشی بە پێی ڕێڕەوی یاسایی نێو پەرلەمان دەبێت، كە دەكاتە 20/8 لەبەر ئەوەی كە 25/7 هەڵبژاردن كراوە، بەڵام بەپێی پەپڕەوی ناوخۆی ناو پەرلەمان، خولی یەكەمی پەرلەمان لە كاتی كۆبوونەوە دەست پێدەكات، بۆیە لە كاتی خولەكەوە دەژمێردرێت، بۆیە پێشبینی دەكرێت لە 20/8 ئەو پڕۆسەیە ئەنجام بدرێت.
• پارتی وەك حزبێكی بەرچاوی گۆڕەپانی سیاسی، تا چەند بڕواتان بەوە هەیە لە كاتی هەڵبژاردنەكاندا هەمان سەركەوتنی جاران بەدەست دێنن؟
– وەك ئەوەی دەبینرێت لە ساڵانی ڕابردوودا، پارتی بە شێوەیەكی بەرچاو دەركەوت، سەركەوتنەكانیش لە ئەنجامی ئەو پەیمان و گفتانەدا بوون كە لە كاتی هەڵبژاردنەكاندا بە خەڵكی كوردستان و دەنگدەرانی دابوون كە بەشێكی زۆر لەو بەڵێنانە هاتنە دی و ڕازی بوون بە سیاسەتی پارتی، لە لایەكی ترەوە لە پرسە نەتەوەییەكاندا هەڵوێستی سەرۆك بارزانی، خەبات و مێژووی پارتی، قوربانیدانەكانی پارتی و ڕاستیی هەڵوێستەكانی، بنەمایە بۆ دروستبوونی متمانە لە نێوان پارتی و خەڵكی كوردستاندا. هاوكات هەڵوێستی ڕاستگۆیانەی پارتی بەرانبەر پرسە چارەنووسسازەكان ڕەنگدانەوەیەكی ئەرێنی هەیە بۆ متمانەدان بە خەباتی پارتی. بۆیە، متمانەیەكی تەواومان بە خۆمان هەیە كە ئەم جارەیش خەڵكی كوردستان، بڕوای بە ئێمە دەبەخشێ.
• وێڕای هەموو ناڕەزاییەك لە شەقامی عێراقی و فراوانبوونی دەنگی ناڕەزایی، كەچی مالیكی لە سیاسەتی خۆی بەردەوامە، ئایا ئەم سیاسەتە چ ڕەنگدانەوەیەكی دەبێت لە لەتبوونی دەستەڵاتی عێراق و ئەو وڵاتە بەرەو كوێ دەڕوات؟
– بەداخەوە، وێڕای ئەو هەموو قەیرانەی كە مالیكی دروستی كرد، لە جیاتی ئەوەی كە هەوڵ بدات بۆ دەرچوون لەو تەنگژانەی عێراق، كەچی بەردەوام بوو لە سیاسەتی تاكڕۆیانەی خۆی، كە عێراقی بەرەو هەڵدێر برد، لە جیاتی هەوڵدان بۆ بەكۆتاهاتنی ئەو تەنگژانە، قەیرانی نوێتری دروست كرد. ئەمەیش حاڵەتێكی وای دروست كردووە كە خودی هاوپەیمانەكانی خۆیشیان لە ئاستی ئەم سیاسەتە بێنە دەنگ و بپرسن كە ئاخۆ تۆ ئەم عێراقە بەرەو كوێ دەبەی.
هەندێك ڕەفتاری زۆر نامۆی ئەنجام دا كە بووە مایەی هەڵایسانی قەیرانی تازەتر، لەوانەیش مەسەلەی هەڵوەشانەوەی پەرلەمانی عێراق، كە بووە مایەی ناڕەزایی توند لە لای هەمووان. بێگومان ئەم هەڵوێستەیش بووە بە مایەی نیگەرانیی مەرجەعە شیعییەكانیش و لێرەیش بووە مایەی ناڕەزاییەكی توند، چونكە بەدەر بوو لە چەمكی دەستوور.
• ئەگەر دانوستانەكان لە نێوان هەولێر و بەغدا نەگەییشتنە ئەنجام ئایا چ ئەگەرێكی تر لە ئارادایە، یان چاكتر وایە بڵێین، خەیاری دیكە لە بەردەم كورددا چییە؟
– كورد بەردەوام دەبێ لە دانوستان و بە هاوپەیمانی شیعەیش ڕادەگەیەنێ كە ئێوە بەرپرسن لەو واقعەی كە ئێستا لە عێراقدا هەیە كە لادانە لە هەموو بنەمایەكی دەستوور، بە ڕوونی پێیشیان دەڵێین ئەگەر ئێوە مەبەستتان ئەوەیە ڕێز لە شەراكەتی نیشتمانی بگرن و چارەنووسی عێراقتان بەلاوە مەبەستە، دەبێ لە سەرۆكوەزیرانەكە بپرسن كەی سنوور بۆ ئەو ڕەفتارانە دادەنێت كە بەدەرە لە هەموو مەسئوولییەتێك، چونكە دەبێ هەموو لایەك ئەو ڕاستییە بزانن كە ئەو حكوومەتە تەنیا حكوومەتی لایەنێك نییە، بەڵكوو حكوومەتی هەموو نەتەوەكانە بە بێ جیاوازی لە ئایین و مەزهەب، بۆیە دەبێ هەوڵ بدرێت كە هاوكێشەكە ڕاست بكرێتەوە، دیارە كە هێز هیچ شتێك چارەسەر ناكات، بە نموونە سەددام حوسێن نەیتوانی بە هێز عێراق لە تەنگژەكان ڕزگار بكات، بەڵكوو ئەو سیاسەتە بووە مایەی ماڵوێرانی بۆ گەلانی عێراق، چونكە گەلانی عێراق لەگەڵ ئەو سیاسەتە چەوتە نەبوون كە پیادەی دەكرد، كە بریتی بوو لە كاولكاری و ئەنفال و جینۆساید.
* تەقینەوەكان بەردەوامن و كەركووكیش جارێكی تر بووەوە قوربانی، بە ڕای بەڕێزت بۆچی بەو تەقینەوانە بارەگاكانی پارتی بوونەتە ئامانجی سەرەكی؟
– دیارە دەمەوێ بڵێم، لەم كاتەدا، چڕكردنەوەی ئەو تەقینەوانە لە ئەنجامی ئەوەیە كە لە ڕووی ئەمنییەوە بۆشاییەك لە عێراقدا هەیە، كە ئەمەیش ڕێگەی خۆش كردووە بۆ دزەكردن بە شارەكانی عێراق و ئاسانكاری لە ئەنجامدانی ئەو كارە تیرۆرستیانە، بێگومان هۆكاری پەلاماردانی پارتیش پەیوەستە بەوەی كە پارتی هەڵوێستی داكۆكیكاری خۆی هەیە و بە ئاشكرا جەخت لەسەر پرسە نەتەوەییەكان دەكاتەوە و سازش لەسەر ئەو مەسەلانە ناكات كە پەیوەستن بە ئاییندەی عێراقەوە. لەوانەیش داكۆكیكردن لەسەر ماددەی 140و هەموو خاڵە دەستوورییەكان.
• ئایا گوتاری ڕاگەیاندنی پارتی لەم قۆناغەدا بە چ ئاڕاستەیەكدا دەڕوات. پارتی هەوڵی داوە كە سیاسەتی كرانەوە پیادە بكات؟.
– چەند ڕۆژێك لەمەوبەر كۆبوونەوەیەكی فراوانی دەزگای ڕۆشنبیری و ڕاگەیاندن بەسترا و تێیدا بە تێروتەسەل تاوتووی ئەركەكانی ئەم قۆناغە كرا و لە كۆتاییدا گەییشتین بە پڕۆژەبڕیارێك كە نەخشەیەكی 3 مانگە پیادە بكرێت كە گوزارشتە لەگەڵ قۆناغی ئەمڕۆ، كە چۆن ڕەفتار بكەین لەگەڵ كێشەكانی نێوان ئێمە و حكوومەت و لایەنی دیكەی ئابووری و سیاسی و جڤاكی، بۆ ئەو مەبەستەیش ڕێنمایی تایبەت دەردەچێت بۆ هەموو كەناڵەكانی ڕاگەیاندن كە چۆن مامەڵە لەگەڵ ئەو سیاسەتەی ڕاگەیاندندا بكەن، جگە لەوەی كە نەخشەی دیاریكراویشمان هەیە كە گوزارشتە لە پڕۆگرامی پارتی و سیاسەتی بەرچاوی لە هەموو مەسەلە نەتەوەیی و نیشتمانییەكاندا.
• ئایا مەسەلەی شێوازی مامەڵەكردنی حكوومەتی عێراق لەگەڵ شێواندنی زمانی كوردی و پیادەنەكردنی دەستوور، كە دانی بەو زمانە ناوە چۆن ڕەفتاری لەگەڵدا دەكرێت؟
– مەسەلەی زمان ڕەگەزێكی بنەڕەتییە لە ڕەگەزە گرنگەكانی نەتەوە، تێبینی دەكرێت كە حكوومەتی عێراق ئەم مەسەلەی بەلاوە ناوە و هەوڵ دەدات كە ئەو زمانە پێشێل بكات، بۆ نموونە، ڕەنگە وانەی كوردی ببێتە وانەیەكی پەراوێزكراو و تەنانەت لە هەموو بەغدا كەم جار تابلۆیەكی كوردی دەبینرێت تەنیا لە ئەنجوومەنی وەزیران نەبێت، كە كاتی خۆی چەسپاوە، بێگومان ئەوەیش ڕەنگدانەوەیەكی سلبی دەبێت و بووە بە مایەی پەرچەكردارێك لەلایەن نەوەی نوێ، ئەمەیش لە ئەنجامی پشتگوێخستنی لەلایەن حكوومەتی عێراق و هەندێك لە نووسەر و ڕۆشنبیرانی عەرەبەوەیە.
