James F. Jeffrey, di duyemîn Foruma Hewlêrê ya bi sernavê “Xalên Veguhertina Rojhilata Navîn û pêşeroja wê” de axivî û got, Tirkiye welatekî bi pirsgirêkan û heta radeyekê ji aliyê dijmin ve hatiye dorpêçkirin.
Mêvanê Forumê yê “Sedsaliya Tirkiyê,100 Sal Piştî Împaratoriya Osmanî” nûnerê berê yê Amerîka yê hevpeymaniya navdewletî ya li dijî DAIŞê û Rêveberê Bernameya Wilson Centerê ya Rojhilata Navîn James F. Jeffrey bû.
Jeffrey, di derbarê têkiliyên Tirkiyê û Kurdan de axivî û wiha got: “Kurdên li Tirkiyê parçe bûne, têkiliyên Tirkiyê jî bi Kurdan re hene. Erdogan di heyama derbasbûyî de ji sedî 30 deng ji Kurdan girt. Hem ji bo Tirkiyê hem jî ji bo Kurdan sempatiya me heye”. Her wiha behsa HDPê jî kir û got: “Partiya siyasî ya Kurd ku piraniya sêyem a parlamentoyê ye, hîn jî di bin zexta PKKê de ye. Wan vê dawiyê bi partiya Erdogan re li ser guhertinên destûrî danûstandin kirin, lê hîn jî nakokiyên ligel vê partiyê hene“.
Jeffrey bi berdewamî anî zimên û got: “Di navbera Kurdên ku sempatiya PKKê dikin û di navbera muhafezekar û Kurdên ku sempatiya AKPê ya Erdogan dikin de têkiliyek tevlihev heye. Ev rewş di van salên dawî de guherî, ji ber ku AK Partî bi Partiya Tevgera Neteweperest re hevalbendî kir, ku bi nerînek neyînî nêzîkî Kurdan dibe. James Jeffrey got ku tifaqa AK Partiyê ya bi MHPê re “pirsgirêkên têkiliyên bi Kurdan re kûrtir kiriye û ew nafikirin ev mijar biguhere”.
