Şaredarê Sakaryayê û bazirganên wê li Kurdistanê ne
Kemal Kerkûkî serokê parlamentoya Kurdistanê pêşwazî li Zekî Okçuoglu şaredarê bajarê Sakaryayê yê Tirkiyeyê û şandeya digel wî kir ku ev çend roj in bi hevalbendiya hejmarek bazirgan û karsazên Tirkiyeyê li herêma Kurdistanê ne.
Di hevdîtinekê de Zekî Okçuoglu diyar kir ku wan di çarçoveya serdana xwe de digel odeyên bazirganiyê yên Hewlêr û Dihokê protokolên hevkariyê îmza kirine û bazirgan û karsazên herêma Kurdistanê bo Sakarya û Malatyayê vexwendine.
Kemal Kerkûkî serokê parlamentoyê jî diyar kir ku aramî û tecrûbeya demokratîk a herêma Kurdistanê ji bo pêwendiyên bazirganî, kulturî digel hemû aliyan, nemaza digel Tirkiyeyê, zemîneke baş e û amadebûna herêma Kurdistanê bo bihêzkirina pêwendiyên herdu aliyan di hemû astan de nîşan da.
Weke tê zanîn Zekî Okçuoglu şaredarê bajarê Sakaryayê yê Tirkiyeyê û şandeya digel wî ku ji hejmarek bazirgan û karsazên Tirkiyeyê pêk tê,roja 22.09.2010ê serdana bajarê Duhokê kir bû û digel odeya bazirganiya Duhokê peymaneke hevkariyê îmza kir.
Di daxuyaniyekê de, Eyad hesen serokê odeya bazirganiya Duhokê got: Serdanên bi vî awayî gelek giring in, ji ber ku Tirkiye dewleteke cîran ku di warê bazirganî, tûrîzim, zîraet û pîşesazî de pêşketî ye. Em di wê bawerê de nek u divê têkeliyên me bi hev re bihêz bin.
Zekî Okçuoglu şaredarê bajarê Sakaryayê jî got ku armanc ji serdana wan ewe ku ji nêzîk haydarî rewşa herêma Kurdistanê bibin û têkeliyên pîşesazî û bazirganî bi odeyên bazirganiyên herêma Kurdistanê re ava bikin. Okçuoglu got: Ew hizra me bo herêma Kurdistanê hebû û nuha piştî me dîtî gelek cudahî heye. Li herêma Kurdistanê pêşketinên baş di warê bazirganî, abûrî û avadankirinê de çê bûyne. Em jî dê beşdariyê di pêşketina herêma Kurdistanê de bikin.
