Partiyên Kurdistanê: Nabe hikûmeta Iraqê pirsa mûçeyan bi nakokiyên siyasî re tevlîhev bike
Aliyên siyasî yên Herêma Kurdistanê bi daxuyaniyek hevbeş ragihandin ku, pêwîst e Hikûmeta Federal a Iraqê pabendî erk û berpirsiyariyên xwe yên li hember xelkê Herêma Kurdistanê be û mafê mûçexwarên Herêmê nexe nav milmilaneyên siyasî. Herwiha tekez kirin ku ew bijardeya diyalog û danûstandinê wek baştirîn rêçare ji bo vê qonaxê dibînin, lê di heman demê de hemû bijarde li ber çavê wan vekirî ne ji bo parastina berjewendiyên bilind ên Herêma Kurdistanê.
Aliyên siyasî yên Herêma Kurdistanê31ê Gulana 2025an di daxuyaniyek hevbeş de amaje bi wê yekê dan ku hêz û aliyên siyasî, civîneke hevbeş li Pîrmamê li dar xistin bi mebesta nirxandina rewşa siyasî ya Kurdistan û Iraqê, û kêşe û arîşeyên di navbera Herêmê û Hikûmeta Federal de. Bi taybetî, biryara dawî ya nedestûrî û neyasayî ya Wezareta Darayî ya Hikûmeta Federal a rawestandina û neşandina mûçeyên mûçexwarên Herêma Kurdistanê hate gotûbêj kirin.
Di daxuyaniyê de hat diyarkirin ku piştî gotûbêj û danûstandina nêrînan a pêwîst li ser vê mijarê, hemû alî hemfikir bûn ku biryara Wezareta Darayî ya Iraqê, biryareke siyasî ye li dijî îradeya gelê Kurdistanê û qewareya siyasî û yasayî ya Herêma Kurdistanê.
Aliyên siyasî yên Herêma Kurdistanê dibêjin: “Li gorî destûra herdemî ya Iraqê, biryara Dadgeha Federal, yasaya karmend û mûçexwarên Iraqê û rêkeftinên di navbera Hikûmeta Herêmê û Hikûmeta Federal de, pêwîst e Hikûmeta Federal pabendî erk û berpirsiyariyên xwe yên li hember xelkê Herêma Kurdistanê be û mafê mûçexwarên Herêmê nekeve nav milmilaneyên siyasî.
Herwiha gotin, “Divê Hikûmeta Federal xwe ji siyaseta birçîkirin û zextxistina ser Herêma Kurdistanê dûr bixe, ji ber ku ev siyaset ji bilî kûrkirina pirsgirêkan, piştguhxistina guhertinên zêde û bilez ên navçeyê ye jî, lewma di berjewendiya ti aliyekî de nîne.”
Di beşeke din a daxuyaniyê de hat ragihandin: “Em wek hêz û aliyên siyasî yên hemû pêkhateyên Kurdistanê, ligel spas û pêzanînên xwe ji bo xweragiriya mûçexwar, fermanber, Pêşmerge, mamosta û gelê serbilind ê Kurdistanê bi giştî, dubare tekez dikin ku helwest, biryar û pêngavên me dê di rêya berjewendiyên welatiyan û Herêma Kurdistanê de bin. Em bijardeya diyalog û danûstandinê wek baştirîn rêçare ji bo vê qonaxê dibînin, di heman demê de hemû bijarde li ber destê me vekirî ne ji bo parastina berjewendiyên bilind ên Herêma Kurdistanê.”
Partî û Aliyên Kurdistanî yên Beşdar:
1. Yekîtiya Nîştimanî ya Kurdistanê (YNK)
2. Tevgera Goran
3. Partiya Sosyalîst Demokrat a Kurdistanê
4. Bizava Îslamî ya Kurdistanê
5. Partiya Komunîst a Kurdistanê
6. Bizava Peywendiya Îslamî ya Kurdistanê
7. Partiya Zehmetkêşên Kurdistanê
8. Partiya Rencderên Kurdistanê
9. Partiya Parêzgaran a Kurdistanê
10. Yekîtiya Neteweyî ya Demokrat a Kurdistanê
11. Bizava Demokratî ya Gelê Kurdistanê
12. Partiya Neteweyî ya Kurdistanê
13. Bizava Rizgarî ya Demokrat a Kurdistanê
14. Partiya Pêşketinxwaz a Demokrat a Kurdistanê
15. Partiya Binyada Demokrat a Kurdistanê
16. Bizava Aştîxwazên Kurdistanê
17. Hevpeymaniya Nîştimanî
18. Partiya Rizgarî ya Kurdistan – Desteya Serokatiyê
19. Partiya Demokrat a Tirkmen
20. Partiya Nîştimanî ya Tirkmen
21. Partiya Rizgarî ya Neteweyî ya Tirkmen
22. Partiya Yekgirtû ya Tirkmen
23. Bizava Tirkmenî ya Bêalî
24. Partiya Geşepêdana Tirkmen
25. Partiya Çaksazî ya Tirkmen
26. Partiya Gelê Tirkmen ê Iraqê
27. Eniya Tirkmenî
28. Bizava Demokratî ya Tirkmen
29. Partiya Gezengî ya Tirkmen
30. Partiya Îradeya Nîştimanî ya Tirkmen
31. Partiya Tirkmen Êlî
32. Lîsta Millet
33. Lîberalê Tirkmenî
34. Partiya Yekîtiya Demokrat a Keldanî
35. Partiya Encumena Neteweyî ya Keldanî
36. Partiya Demokrat a Bêth Nehrên
37. Partiya Encumena Millî ya Keldanî Suryanî Aşûrî
38. Rêwta Şelama
39. Partiya Bizava Civîna Suryanî
40. Komeleya Rewşenbîrî ya Ermenî
41. Desteya Kargêrî ya Rêveberiya Taîfeya Ermenî
42. Rabîteya Keldanî ya Cîhanî
43. Partiya Demokrat a Kurdistanê (PDK)
