Serokê Herêma Kurdistanê Nêçîrvan Barzanî pêşwazî li şandeke Amerîkî ya bi serokatiya Cîgirê Wezîrê Derveyê Amerîkayê Joey Hood kir.
Her du aliyan teqezî li ser giringiya lihevkirin û yekrêziya aliyên Kurdistanî kirin.
Serokatiya Herêma Kurdistanê diyar kir ku di civînê de behsa mijarên herî dawî yên pêşkevtinên di rewşa siyasî ya Iraqê de, peywendiyên Iraqê û Herêma Kurdistanê bi Amerîka re, peywendiyên Hewlêr û Bexdayê û hewlên ji bo çareserkirina kêşeyan, metirsîya DAIŞê, rewşa devera Şingalê û rewşa aboriya Iraqê û Herêma Kurdistanê hatin kirin.
Di daxuyaniyê de hat diyarkirin ku, Cîgirê Wezîrê Derveyê Amerîkayê Joey Hood spasiya Serokê Herêma Kurdistanê Nêçîrvan Barzanî kir ji ber pêwendî û hevkariyê û teqezî li ser dostayetiyeke bihêz û berdewamiya hevkarî û piştgiriya Amerîkayê ji bo Iraq û Herêma Kurdistanê kir.
Hat ragihandin, di civîna ku çend diplomat û berpirsên konsulxaneya Amerîkayê yên li Herêma Kurdistanê amade bûn de, mijara azadiya raderbirînê, mafên mirovan û serweriya qanûnê, şerê Rûsya û Ukraynayê, rewşa Afganistanê û dever bi giştî hatin guftûgokirin.
Hat destnîşankirin ku Nêçîrvan Barzanî hêviya serkeftinê ji Joey Hood re xwest ku biryar e di demeke nêz de di posteke nû ya dîplomatîk de dest bi kar bike.
