Ji bo bîranîna serhildana Rojavayê Kurdistanê
Ji buharê ta buharê
Çend binefş bişkivîn….?
Çend nêrgiz çilmisîn….?
Çend gelawêj çirisîn…?
Çend barbang fetisîn….?
Ji Helabça ta Qamişlo
Çend aheng
Çend Festîvalên jiyanê
Têne li darxistin….?
Ji cejnên mirinê ta cejnên jînê
Çend Leyla
Çend Agîd
Çend Samî
Çend Ciwan
çend Qasimlo
Ji dayik Dibin….?
Çend Pêxemberên nuh
Çend Zaradeştên kal
Avistayê didomînin…….?
buharê ta buharê
Çend Barzanên nuh
Ji biskên hetaw
têne der…..?
Çend Qadî
Di zikê Mihabadê de
Bûne çira û fener
Çend Şêx Sehîdên nuh
Ji mizgeftan
Ji hicrikên bi ocax
Vedan kesser
Çend Maşûqên nuh
Dijîn bi hêrs
Bo qada sor û zer
Ji adarê ta adarê
Çend Anahîta
Çend Yezdanên dilbijok
Têne xapandin
Çend Şaxoşînên nuh
Têne perçiqandin
Ji serê salê ta binê salê
Çend bêrîkirin
Dikevin bin pêlavên biyaniyê de
Çend firmêsk
Di qermîçokên riwên zuhade
Têne veşartin
Nesrînê ta M. Şêxo
Çend Şeydayên nuh
Distirînin ji bo Dilberê…….?
Cend zeryên nuh
Dinerin ji pencerê…..?
Ji Cegerxwîn ta Tîrêj
Çend helbestvanên nuh
Dest tavêjin kemberê..-….?
Ji Isqa Nîşanî ta evîna
Feqhê gerhok
Çend Bêkesên nuh
Hildigrin pênûs û fenerê……?
Çend Agirdadên nuh
Vêdixin luksa berê…….?
Ji Orkêş ta Qamişlo
Çend Pakrewan
Ji pêsîra goristanan
Ber bi asîman ve hilperikîn
Çend Agirdadên nuh
Ji xuncên gulan herikîn….?
Dê tu Agirdadbî
Dê 12 adarê jî cejnbî……..!
Ji buharê ta buharê
Dê tu Agirdadbî
Samana Newroza mebî
Dê tu arama çavên ku di bendamanêde
Melûl,….melûl
Şilo pilo Dibin
û dîse bi omîdên dîtinê avis dibin
Ji adarê ta adarê
Çendîn mahîtab rawistandin
Çendîn afîtab di binê awrande nixumandin
Dê tu Agirdadbî
Dê tu ronî bikî xewnên me
Dê tu germ bikî dilkê dilê me
Dê tu Agirdadbî
keftelefta Mendalekî
Ku ji nuh, îro ji dayik dibe
Dê tu hilm û bîna Rîhaneke
di nav kavilên wêrande
Hewl didî ku serî rake
Dê tu bejna findeke
Ku ji nuhve tête vêxistin
Dê tu Agirdadbî
Di şopên buhara me de
Tu ne buyerî
Di hinavê dîroka me de tu SERHILDANÎ
Mizgîn Hesko
12.03.2005
(gemiyakurdan)
