Li gorî nûçeyekê serokê îstîxbarata Misirê çend roj beriya 7ê Cotmehê serdana Îsraîlê kiribû da ku hişyariyeke ewlehiyê bide.
Kovara The Atlantic eşkere dike ku, Abbas Kamel di 50emîn salvegera Şerê Yom Kippurê de – yanî 11 roj beriya 7ê Cotmehê – serdana Îsraîlê kiribû û hişyarî dabû ku Hemas xwe ji bo êrîşeke mezin amade dike.
Serokê îstîxbarata Misrê Abbas Kamel bi dizî tenê 11 roj berî êrîşa 7ê Cotmehê serdana Îsraîlê kir û hişyariyek da ku Hamas ji bo êrîşeke girîng amadekariyan dike û dema ji bo pêşîgirtina li zêdebûna aloziyan diqede, lêkolîneke rojnameya The Atlantic roja Şemiyê eşkere kir.
Rapor dibêje ku, di 26ê Îlona 2023an de, dema ku rayedarên payebilind ên Îsraîlê li Orşelîmê ji bo pîrozkirina 50 saliya Şerê Yom Kippur kom bûn, balafireke Cessna ya kirêkirî ya bi servîsên îstîxbarata Misrê ve girêdayî li Balafirgeha Ben-Gurion daket. Di raporê de hat gotin ku balafir li deverek dûr a balafirgehê rawestiya ku ji bo mîsyonên dîplomatîk û ewlehiyê yên hesas tê bikar anîn.
Di balafirê de Kamel hebû, ku wê demê wekî serokê Servîsa Îstîxbarata Giştî ya Misrê kar dikir û yek ji kesayetên herî nêzîk ên Serokê Misrê Abdel Fattah el-Sisi bû. Tê gotin ku balafir tenê 67 xuleka(deqîqe) li Îsraîlê maye berî ku vegere Qahîreyê, û The Atlantic dibêje ku demjimêr di tomarên firîna Desteya Balafirgehên Îsraîlê de xuya dike û her weha ji hêla servîsên şopandina firîna serbixwe ve jî hatiye belgekirin.
Rayedarên Îsraîlî, Ereb, Amerîkî û Ewropî yên ku piştî 7ê Cotmehê li ser serdanê agahdar bûn, gotin ku Kamel hişyarî da ku xuya ye Hamas ji bo êrîşeke mezin amadekariyan dike, di raporê de hat gotin ku wî ji Îsraîlê xwestiye ku gavên aborî bavêje da ku rageşiya li Şerîda Xezzeyê kêm bike. Rayedarekî berê yê Îsraîlî ku li ser civînê agahdar bû, peyama Misrê wiha rave kir: “Heke hûn rêça xwe neguherînin, Xezzeyê dê li ber çavên we biteqe.”
Di hişyariyê de planeke êrîşê ya taybetî tunebû.
Lêpirsîna destnîşan kir ku Kamel ji bo êrîşeke muhtemel tarîxek nedaye, hedefan destnîşan nekiriye, an jî hûrguliyên berbiçav li ser cewherê gefê parve nekiriye. Di serdana xwe ya saetekê ya Îsraîlê de ne diyar e ku ew bi rastî bi kê re civiyaye.
Di wê demê de, piraniya hişyariyan li ser îhtîmala zêdebûna aloziyê, avêtina mûşekan an nûbûna tundûtûjiyê li Xezeyê bûn, ne li ser êrîşa hevrêzkirî û piralî ya ku Hamasê di 7ê Cotmehê de pêk anîbû.
Tevî vê yekê, rayedarên ji heft welatan ku bi kovara *The Atlantic* re axivîn, diyar kirin ku serdana kesane ya serokê îstîxbarata Misrê bo Îsraîlê ji bo serdaneke ewqas kurt û lezgîn, diviyabû bala serokatiya siyasî û ewlehiyê ya Îsraîlê bikşanda.
Rayedarekî berê yê Îsraîlî got, “Peyam di kesayetiya şandeyê de bû” û anî ziman ku ti senaryoyeke wiha tune bû ku tê de rayedarên payebilind ên Îsraîlî bi serokê îstîxbarata Misrê re bicivin bêyî ku Serokwezîr Benjamin Netanyahu ji vê yekê agahdar be.
Rayedarekî Misrî ji *The Atlantic* re got ku serdana kurt a Kamel bo Îsraîlê nîşan dida ku Sîsî bawer dikir pêwîst e ew bi xwe biçe da ku peyamê bigihîne.
Hişyariyên Misrê heta çend roj beriya êrîşê berdewam kirin.
Çend roj piştî êrîşa 7ê Cotmehê, Ofîsa Serokwezîr wan raporan red kir ku digotin Misrê beriya êrîşê hişyarî dabû. Di wê demê de hat gotin ku Netanyahu “ji dema avakirina hikûmetê ve ne rasterast û ne jî nerasterast bi serokê îstîxbarata Misrê re ne axiviye û ne jî civiyaye.”
*The Atlantic* ragihand ku ofîsên Netanyahu û Sîsî bersiva pirsên derbarê hûrgiliyên nû yên eşkerekirî yên serdana Kamel de nedan. Tzachi Hanegbi, ku di wê demê de serokê Encûmena Ewlehiya Neteweyî bû, vê hefteyê ji kovarê re got ku Kamel serdana Îsraîlê nekiriye û ti hişyariyeke Misrî nehatiye dayîn.
Rayedarên Îsraîlî, Misrî û Amerîkî gotin ku hişyariyên Misrê heta du roj beriya êrîşê berdewam kirin. Di 5ê Cotmehê de, Misrê peyameke din ji Îsraîlê re şand û hişyarî da ku rewş nikare bi vî awayî berdewam bike û bal kişand ser lezgîniya îhtîmala êrîşê. Di wê peyamê de jî behsa dîrok an rêbaza operasyonê nehatibû kirin.
Di lêkolînê de hat destnîşankirin ku di heman roja ku Kamel gihîşt Îsraîlê de, Netanyahu beşdarî merasîma salvegera Şerê Yom Kippurê bû. Di axaftina xwe de, wî behsa têkçûna îstîxbaratê ya sala 1973yan kir û got ku Îsraîl ti gefê bi sivikî nagire. Bernameya wî ya giştî nîşan dida ku ew piştre di heman rojê de beşdarî civîneke agahdarkirinê ya nepenî bûye.
