Goran naxwaze PDK hikûmetê pêk bîne
Karîgerê Polîtburoya Yekîtiya Niştimanî ya Kurdistanê (YNK) Mela Bextiyar eşkere kir ku Tevgera Goran daxwaz ji wan kiriye daku bi wan re bibin yek û nehêlin Partiya Demokrata Kurdistanê (PDK) kabîneya nû ya hikûmetê pêk bîne.
Di hevpeyvînekê de ligel rojnameya Şerq El Ewset a Erebî, Mela Bextiyar behsa hinek nehêniyan dike ku Tevgera Goran daxwaz ji wan kiriye bi hev re rêkeftinekê bikin û nehêlin PDK hikûmetê pêk bîne.
Di vê derbarê de Karîgerê Polîtburoya YNK’ê Mela Bextiyar got: ‘’YNK’ê daxwazeke Tevgera Goran red kir bo pêkanîna hevpeymaniyekê ligel aliyên mixalefetê daku bi hev re hikûmeta dahatû pêk bînin.’‘
Mela Bextiyar wiha dibêje: ‘’Di hilbijartina Parlamentoya Kurdistanê de YNK’ê 19 kursî misoger kirine û di encamên dawî de em pêşbînî dikin ev hejmar bibe 2 kursî. Em ne li benda vê encamê bûn, lê belê giraniya YNK’ê wek xwe dimîne.’‘
Mela Bextiyar dide zanîn ku mercên Tevgera Goran giranbûn, danûstandina ligel wan nexweş e û axaftina xwe wiha bi dawî dike: ‘’Li gor rêkeftina stratejîk a navbera YNK û PDK’ê di hikûmeta dahatû de wê pişka me û PDK’ê wek hev be.’‘
Hêjayê gotinê ye piştî belavbûna vê hevpeyvînê, yekser Tevgera Goran ew axaftinên Mela Bextiyar red kirin û ragehand ku tu daxwazeke wiha ji Yekîtiya Niştimanî ya Kurdistanê nekirine.
