Em dikarin pêşiyê li êrîşên Îranê bigirin

Berdevkê hêzên DYAyê yên Iraqê Jefry Biyogatin, ji AKnewsê re axivî û diyar kir, divê Îran, hurmeta serweriya xaka Iraqê bigire û got, heke Îranê, hest bi metirsiya “komên dijber” kir, divê digel hikûmeta Iraqê, vê yekê çareser bike.

Biyogatin, wiha pêde çû, “Em dê hemû alîkariyên îstixbaratiyên xwe pêşkêş bikin, lê rola sereke ya hikûmeta Iraqê ye.”

Berdevk Biyogatin, wiha axivî, “Heke hikûmeta Iraqê, daxwaza alîkariyê ji me bike, em dê di warê şêwir, meşq û rahênanê de alîkariyê bikin. Her cihekê bixwazin em amade ne.”

Artêşên Îran û Tirkiyeyê, bi hêceta hebûna kempên hêzên çekdar ên PKK û PJAKê, deverên sînorî yên Herêma Kurdistanê didin ber topan. Heta niha, gelek zirarên canî û aborî li xelkê deverê ketiye.

Ev yek rastî nerazîbûna rayedarên Iraq û Herêma Kurdistanê hatiye. Di vê çarçoveyê de, Serokê Herêma Kurdistanê Mesûd Barzanî, 3ê Tîrmehê, di daxuyaniyekê de, topbarana deverên sînorî yên Herêma Kurdistan û Iraqê ji aliyê artêşa Îranê ve şermezar kiribû û gotibû, “Ev helwesta Îranê, dê zirarê bide têkiliyên her du aliyan.”