Wezareta Parastina Tirkiye ragihand ku baregeha Başîka-Zilkan a li Iraqê(li başûrê Kurdistanê), ku ji sala 2015an vir ve ji hêla Hêzên Çekdar ên Tirkiyeyê ve tê bikar anîn, dê gav bi gav radestî rayedarên Iraqê were kirin. Radestkirin dê li gorî mekanîzmaya lihevkirî were kirin.
TEQEZ LI SER GAVÊN HIKÛMETA ÎRAQÊ LI ŞENGALÊ
Wezaretê di daxuyaniya xwe ya derbarê baregeha Başîka-Zilkan de diyar kir ku, ew pêşwaziyê gavên dawî yên ku ji hêla Hikûmeta Navendî ya Iraqê ve ji bo avakirina desthilatdariya dewletê li Şingalê hatine avêtin dikin.
Hat gotin ku baregeha Başîka-Zilkan ji sala 2015an vir ve li ser daxwaza rayedarên Iraqê wekî beşek ji têkoşîna li dijî rêxistina terorîst a DAIŞê ji hêla Hêzên Çekdar ên Tirkiyeyê ve tê bikar anîn.
Wezaretê ragihand ku li gorî pêşketinên di operasyonên ewlehiyê yên li Şingalê de, biryar hatiye dayîn ku baregeh radestî rayedarên Iraqî were kirin.
Daxuyanî wiha ye: “Biryar hatiye dayîn ku Baregeha Başîka-Zilkan, ku ji sala 2015an vir ve li ser daxwaza rayedarên Iraqî di çarçoveya têkoşîna li dijî rêxistina terorîst a DAIŞê de ji aliyê Hêzên Çekdar ên Tirkiyeyê ve tê bikaranîn, di çarçoveya pêşketinên di operasyonên ewlehiyê yên ji aliyê Hikûmeta Navendî ya Iraqê ve li Şingalê de hatine kirin, gav bi gav radestî rayedarên Iraqî were kirin.”
Li gorî vê, radestkirina Baregeha Başîka-Zilkan dê bi carekê ve neyê kirin. Pêvajo dê li gorî mekanîzma û dema ku di navbera aliyan de li hev hatiye kirin, gav bi gav were kirin. Daxuyaniya Wezareta Parastinê di derbarê tarîxek diyarkirî ya temamkirina pêvajoya veguhastinê de tu agahî nedaye.
Wezaretê ragihand ku di çarçoveya peymanên dualî de di warên zêdekirina kapasîteya leşkerî, parvekirina ezmûn û pisporiyê di şerê li dijî terorê de, perwerdehiya leşkerî û hevkariya pîşesaziya parastinê de, dê piştgirî ji Hêzên Çekdar ên Iraqê re berdewam bike.
