Tora Medyayî ya Rûdawê di Xelatên Cannesê yên Medya û Televîzyonê ya sala 2026an de 2 serkeftinên mezin bi dest xistin.
Du beşên bernameya “Hîn jî Maye” ya ku rojnamegerê navdar ê Rûdaw û Kurdistanê Hêvîdar Ehmed pêşkêş dike, xelat wergirtin.
Beşa “Hîn jî Maye: Paşeroja Hizbulahê”, di kategoriya “Current Affairs” de bû xwediya xelata Xelata Dolfînê.
Di heman demê de, beşa “Hîn jî Maye: Dawiya Mezopotamyayê” di kategoriya “Jîngeh, Ekolojî û Berdewamî” de bawernameya gihîştina qonaxa fînalê (Finalist) wergirt.
Merasîma xelatan a li ser xalîçeya sor 24ê Îlonê li bajarê Cannesê yê Fransayê tê sazkirin û xelat dê bi awayekî fermî pêşkêşî Rûdawê were kirin.
Xelatên Cannesê yên Medya û Televîzyonê sala 2010an hatine damezirandin.
Her sal merasîma dabeşkirina wan li bajarê Cannesê yê Fransayê tê lidarxistin.
Ev festîval berhemên kanalên televîzyonê, şirketên hilberînê û ajansên medyayê dinirxîne.
Tenê beşeke diyarkirî ya berheman dibin xwediya Xelata Dolfînê.
Heta niha dezgehên herî navdar ên cîhanê di vê festîvalê de hatine xelatkirin ku di nav wan de Bloomberg Media, Dengê Amerîkayê (VOA), Al Jazeera, Deutsche Welle û Warner Bros. Discovery hene.
“Em serbilind in”
Birêvebirê Hilberînê yê Tora Medyayî ya Rûdawê Rêbaz Elî li ser mijarê anî ziman:
“Ev xelat berhema xebata bêwestan a tîma me ya jêhatî ya di beşa hilberînê de ye.
Ev nîşaneya asta bilind a Hêvîdar Ehmed e ku di warê lêkolînê de rojnamegerekî serkeftî ye.
Her wiha ev nîşaneya serkeftina me ya di gihandina çîrokên girîng ên herêma me ya ji bo cîhanê de ye.
Em serbilind in ku nûnertiya medyaya Kurdî li ser dika navneteweyî dikin.
Em dê hilberîna naverokên bibandor û xwedî standardên bilind bidomînin.”
Bernameya “Hîn jî Maye”
Bernameya “Hîn jî Maye”, yek ji bernameyên Tora Medyayî ya Rûdawê ye.
Ev bername bi hûrgilî lêkolînê li ser wan dosyeyan dike ku bandora wan berdewam dike.
Her wiha pirsên navxwe û herêmî bi guherînên siyasî û jîngehî yên navneteweyî ve girê dide.
Ev xelata sêyem a navneteweyî ye ku bernameya “Hîn jî Maye” di nava kêmtirî salekê de bi dest dixe.
Bernameyê berê xelatên Telly (Telly Awards) û Xelata Zêrîn a Stevieyê (Stevie Awards) wergirtibûn.
Ev serkeftin careke din pêgeha bibandor a Rûdawê wekî dezgeheke medyayî ya pêşeng a li ser asta cîhanê piştrast dike.
Tora Medyayî ya Rûdawê dê gihandina çîrokên herêmê bi standardên herî bilind ên pîşeyî û naskirina rojnamegeriya Kurdistanê ya li cîhanê bidomîne.
Tora Medyayî ya Rûdawê
8ê Tebaxa 2026an
