بۆچی پەنا دەهێننەوە بەر هەولێر و بارزانی؟

نەوڕەس ڕەشید

بیمار، نەخۆش پێویستی بە حەكیمە چارەسەری دەردی بیمارییەكەی بكات، نەخۆش ڕێنوێنیەكانی حەكیم بە وردی پەیڕەو بكات وەك بۆی دیاریكردوە و لەسەری بڕوات، دەردەكەی لەكۆڵ دەبێتەوە. بیمار و دەردەدار هەیە كە دەچێتە لای حەكیم و دەرمان وەردەگرێ، دوای بەكارهێنانی دەرمانەكە هەست بە باشی و ئارامی دەكات، دەكەوێتە حاڵەتێك كە خۆی و حەكیم و دنیاو ئەو پارێز و ڕێنوێنیانەی بۆی دانراوە كە دەبێت لەسەری بڕوات لەبیری دەكات تا كاریگەری دەرمانەكە كەم دەبێتەوەو نامێنێت ئەوسا ناچار دەبێت پەنا بباتەوە بەر حەكیم و داوای دەرمانی لێ بكات، حەكیم دەزانێت دەردەدار كەوتۆتە حاڵی مەستی وپارێز و ڕێنوێنیەكانی لەبیركردووە.  لەبەر ئەوە دەزانێ كە نابێت بێ مەرج جارێكی تر دەرمانی بۆ بنووسێت. كاتێك وڵات و دەسەڵاتی سیاسی بەهۆی ململانێ و ناكۆكی دەستەی دەسەڵاتدارەوە، كێشەو گرفت وتەنگەژە دەبێت، لە ڕووی سیاسی، یاسایی، ئابووری و كۆمەڵایەتییەوە، بیماری دەكات پێویستی بە حەكیمی سیاسی و دیپلۆماسی هەیە چارەسەری بكات. عێراق ساڵی 2010 بۆ ماوەیەكی زۆر گرفتاری بیماری و دەردی سیاسی بوو، تەندروستی تێكچوو بەدەم دەردەوە دەیناڵاند، زۆر هەوڵیاندا چارەسەری بكەن، بەڵام سوودی نەبوو، تا ڕوویان لە هەولێر كرد و پەنایان بردە بەر حەكیمی كورد (مسعود بارزانی) و داوای چارەسەریان لێكرد. حەكیم دەرمان وپارێز و ڕێنوێنی لە ڕاچێتەی ڕێككەوتننامەی هەولێردا بۆ دەرد و دەردەدار دیاریكرد، كاتێك بیمارەكە یەكەم (جورعەی) دەرمانەكەی وەرگرت هەستی بە ئارامی و خۆشی كرد، مەست بوو، ئەوەی لە ڕاچێتەكەی هەولێردا بوو پشتگوێی خست، خۆی وحەكیم و هەولێر و دنیای لە بیرچۆوە، دەردەكە وردە وردە تەشەنەی كرد جەستەی عێراقی توشی هەوكردن و تاو ژان و هات و هاوار كردەوە، كە ڕۆژ لە دوای ڕۆژ بەرەو خراپتر دەڕوات، بە جۆرێك چاوەڕوانی خوێن لەبەر ڕۆیشتن و دابڕان و دابەشبوونی لێدەكرێ. ئەم حاڵەتەی عێراق بۆتە مایەی نیگەرانی و دڵەڕاوكێ، هەندێ لایەن بەدوای چارەسەردا دەگەڕێن، بیریان لە حەكیمەكەی هەولێر كردەوە، لەگەڵ ئەوەی حەكیم بڕواو متمانەی بە دەردەدارەكە نییە لە پارێز و ڕێنماییەكانی لایداوە كێشەو گرفتیشی بۆ دروستكردوە، بەڵام پەنای بۆ دەهێننەوە لەبەر ئەوەی باشترین حەكیمە كە ڕاستگۆ و زانا و بەتوانا و بە ئەزموون و بوێر و لێهاتووە. هەر حەكیم بوو كە نزیكەی ساڵێك لەمەوبەر ڕایگەیاند، دەردەدارەكە پابەند نییە بەو دەستوورەی چارەسەری دەردە یاسایی و سیاسی و كۆمەڵایەتییەكانی عێراق دەكات و لەو ڕێككەوتنەی هەولێر پاشگەزبۆتەوە و دەردی تاكڕەوی و پاوانخوازی و دیكتاتۆری بیرو دەروون و ڕەفتاری داگیر كردووە. گەر زوو چارەسەر نەكرێت ژیان لەگەڵیا ئەستەمە و دەردەكە بۆ عێراق دەبێتە پەتایەكی كوشندە. گەڕانەوەی عێراقییەكان بۆ هەولێر و پەنابردنەوە بەر حەكیم (مسعود بارزانی) هۆكاری یاسایی، سیاسی، كۆمەڵایەتی، مێژووی و ئەخلاقی هەیە، كە لەم خاڵانەدا كورتی دەكەمەوە:
– هەولێر بەشێكە لە كیانی دەستووری عێراق كەدانی پێدانراوە و باوەڕپێكراوە.
– هەولێر لە هەیكەلی سیاسی و كۆمەڵایەتی عێراقدا پێگەیەكی تایبەتی هەیە كە لە ڕووی یاسایی و سیاسی و كۆمەڵایەتییەوە ڕۆڵ و كاریگەری خۆی هەیە
– لەپڕۆسەی ئازادكردنی عێراقەوە تا ئەمڕۆ هەولێر بەشێك بووە لە چارەسەر، لەگەڵ ئەوەی كێشەو گرفت و تەنگژەی بۆ دروستكراوە، بەڵام نێوانی لەگەڵ لایەنە عێراقییە ناكۆكەكاندا وەك یەكە.
– هەولێر ڕۆڵی سەرەكی بینی لە هێنانی عەرەبی سوننە لە عێراقدا بۆ ناو پڕۆسەی سیاسی و بەشداریكردنیان لە دەسەڵاتدا.
– هەولێر بنەماكانی لێبوردەیی و پێكەوەژیانی بە ئازادی تیادا بەرجەستەیە.
– هەولێر دەمارگیر و خۆپەرست و توندڕەو نییە، ئەوەی هەیەتی دەیەوێت ئەوانی دیكەش لێی سوودمەند بن.
– هەولێر بە زمانێك قسە ناكات كە هەڕەشە ئامێز و توندوتیژ بێت، بەڵكو زمانێكی نەرم و هێمن بۆ لێك تێگەیشتن بەكاردەهێنێت، كە دەگەڕێتەوە بۆ پاشخانی مێژووی بزاڤی ڕزگاریخوازی كوردستان، كە باوەڕی بە تاكتیكی دیالۆگی هێمن و لێكگەیشتن هەیە.
– هەولێر پابەندە بە دەستور و ڕێككەوتننامەو پرەنسیپە سیاسییە نیشتیمانی و نێودەوڵەتییەكان و داكۆكیان لێدەكات.
– هەولێر لایەنگیری جیاوازی تایفی ناكات.
– هەولێر لە ناوچەكەدا خاوەنی ئارامی و سەقامگیری سیاسی و كۆمەڵایەتییە، كە پاكی و جوانی پێ بەخشیوە.
– مسعود بارزانی كە سەرۆكی ئەم كیانە دەستووری و سیاسی و كۆمەڵایەتییەی كوردستانە، بەرهەمی مێژوویەكی پڕ لە سەروەرییە لە خەبات و قوربانیدان.
– خاوەنی ئەزموونێكی دەوڵەمەندە لە ژیانی سیاسی و چۆنیەتی مەمەڵەكردندا لەگەڵ هاوكێشە سیاسییەكان و سەنگی هێزەكاندا.
– دیدگایەكی مرۆڤ دۆستانەو ئازادیخوازانەی هەیە.
– بە ئەخلاقی بەرپرسێتی سیاسی لە ڕوانگەی بەرژەوەندی نیشتیمانییەوە، ڕاستگۆیانە، بوێرانە، بێ لایەنانە، بابەتیانە ڕووداو و بابەتی كێشەو ناكۆكی و تەنگژەكان دەخوێنێتەوە و هەڵیاندەسەنگێنێت.
– وەك مەرجەع لەسەر ئاستی كوردستان و عێراق و نێودەوڵەتیدا جێگەی بڕواو متمانەیە، لە لایەن گەلی كوردستانەوە بە پێی بنەماكانی دیموكراسیەت شەرعیەتی هەیە و متمانەی پێ كراوە.
تێبینی: بەكارهێنانی ناوی هەولێر ئاماژەیە بۆ كوردستان.