Kurd neçar bibin dê biryarek din bidin
Nêçîrvan Barzanî serokwezîrê Kurdistanê, pêşwazî li Umer Elkenderî konsulê giştiyê dewleta Kwêtê li herêma Kurdistanê kir û bi minasibeta destbikarûbna wî wele konsulê giştiyê Kwêtê li herêma Kurdistanê pîrozbahî lê kir û di kar û xebatên wî de serkeftin jê re xwest. Di civînekê de, serokwezîrê Kurdistanê û konsulê giştiyê Dewleta Kwêtê behsa şerê dijî teroê li herêma Kurdistan û Îraqê û tesîra wî şerî li ser deverê bi giştî û li ser herêma Kurdistanê bi taybetî kir. Konsulê Kwêtê rola hikûmeta herêma Kurdistanê di pêşwazîkirin û hewandina koçber û penaberan û alîkarîkirina wan bilind nirxand. Behsa derfetên berhemanînê hat kirin û konsulê Kwêtê got ku welatê wî dixwaze kompanî û berhemînerên kwêtî li herêma Kurdistanê di warên cuda de sermayeyê xwe birazînin û pirojeyan encam bidin, bi taybetî xurtkirina têkeliyên bazirganî û êkonomî digel herêma Kurdistanê. Nêçîrvan Barzanî serokwezîrê herêma Kurdistanê, kêfxweşiya xwe li hember pêşveçûna têkeliyên navbera herêma Kurdistan û Kwêtê diyar kir û got ku deriyên herêma Kurdistanê ji bo hatina kompanî û sermayedarên kwêtî vekirîne û hikûmeta herêma Kurdistanê jî amadeye bi her awayî hêsankarî û alîkariya wan bike. Di civînê de ku hijmareke ber bi çav ya rêjnamevanên Kwêtê amade bibûn, Nêçîrvan Barzanî behsa rewşa îro ya herêma Kurdistanê û dever tê de derbas dibe bi taybetî di warê siyasî, êkonomî, emnî û leşkerî de kir û got ku herêma Kurdistanê dixwaze têkeliyên xwe digel hikûmeta federaliya Bexdayê normal bike û hemû pirsgirêkan çareser bike û Îraq di warê cografî, siyasî, civakî, bazirganî û êkonomî de ji bo herêma Kurdistanê giringe, lê eger hikûmeta Îraqê bi vî awayî digel herêma Kurdistanê tevbigere, herêma Kurdistanê dê neçar bibe hizra rêyek din bike.
