Hêzên asmanî yên Amerîka û Brîtanya 5 parêzgehên Yemenê bombebaran kirin

Fermandariya Navendî ya Amerîkayê (CENTCOM) ragihand ku wan 36 baregehên Hûsiyên Yemenê li 13 deveran kirine armanc. Berdevkê Hûsiyan diyar kir ku hêzên hewayî yên DYA û Brîtanyayê 48 êrîş li 5 parêzgehên Yemenê pêk anîne.

Fermandarîya Navendî ya Amerîkî got ku êrîşên asmanî balê dikişînin ser cihên ku Hûsiyan ji bo êrîşkirina keştiyên bazirganiyê li Deryaya Sor bikar tînin, di nav de cebilxane, embarên drona, pergalên radarê û helîkopterên ku di binê erdê de hatine veşartin.

Centcom got ku armanca wan êrîşan qelskirina şiyanên leşkerî yên Hûsiyan bû ji bo rakirina metirsiyên li ser tevgera keştiyan li Deryaya Sor.

Berdevkê Hûsiyên Yemenê Yahya Sarrî ragihand ku balafirên şer ên Amerîka û Brîtanyayê di 24 saetên dawî de 48 êrîşên esmanî li 5 parêzgehan pêk anîne.

Li gorî Sarri, 13 êrîş li paytext Sanaa, 9 li Hedîthe, 9 li Taiz, 7 li Bayza û yek jî li Saada hatine kirin.

​