Hejmara miriyên erdhejê bû 41 hezar û 156

Li 11 bajarên ku bandora erdhejê li wan bajaran çêbû, Serokê AFADê Yunus Sezer îro Yekşemê 20ê Sibata 2023an amarên herî dawî yên qurbaniyan ragihand.

Yunus Sezer eşkere kir: “Mixabin di erdhejê de heta niha 41 hezar û 156 kesan canê xwe ji dest dane. 35 hezar û 250 karmendên lêgerîn û rizgarkirinê piştgirî dan xebatan. Niha 19 hezar karmendên lêgerîn û rizgarkirinê dixebitin. Li herêmê zêdetirî  250 hezar karmend kar dikin. Niha 15 hezar û 250 makîneyên kar dixebitin. 78 balafir û 116 helîkopter karên xwe berdewam dikin.”

Ji ber erdheja roja 6ê Sibatê, li 11 bajarên Bakurê Kurdistanê û Tirkiyê bi hezaran avahî hilweşiyan û zêdetirî 2 milyon kesan bo bajarên din koç kirin.

AFADê roja Yekşemê 19ê Sibatê ragihand ku piştî erdheja Mereşê 6 hezar û 212 paşlerze qewimîne.