Brîtanya destûr da Amerîkayê ku bingehên wan bi karbînin.
Brîtanya ‘piştgiriyê dide’ êrîşên Îranê: Destûr dide Amerîkayê ku baregehên xwe bikar bîne
Serokwezîrê Brîtanyayê Starmer ragihand ku Amerîkayê destûr xwestiye ku baregehên Brîtanî bikar bîne da ku li depoyên mûşekên Îranê bixe û wan ev daxwaz qebûl kiriye.
Serokwezîrê Brîtanyayê Keir Starmer di peyameke vîdyoyî de ku li ser hesabê xwe yê medyaya civakî parve kir, li ser rewşa Rojhilata Navîn axivî.
Starmer diyar kir ku li welatên ku Îranê êrîşî wan kiriye nêzîkî 200,000 welatiyên Brîtanî hene û ew ê her tiştî bikin da ku piştgiriyê bidin wan.
Wî her wiha destnîşan kir ku Hêzên Çekdar ên Brîtanî yên li seranserê herêmê hatine bicihkirin ji ber kiryarên Îranê di xetereyê de ne û nirxand ku tevgera Îranê her ku diçe bêhiş dibe.
Starmer diyar kir ku biryara Brîtanyayê ya ne beşdarbûna di êrîşên li dijî Îranê de “biryarek hişmend” bû û sedema herî girîng a vê yekê baweriya wan bû ku rêya herî baş ji bo herêmê û cîhanê çareserî bi rêya danûstandinan e.
Starmer got ku ev çareserî ji Îranê dixwaze ku dev ji armanca xwe ya pêşxistina çekên nukleerî berde, lê Îran hîn jî zirarê dide berjewendiyên Brîtanyayê û gelê Brîtanyayê û hevalbendên wê yên li herêmê dixe xetereyek mezin de.
Serokwezîr Starmer diyar kir ku Keyaniya Yekbûyî dixwaze hevkarên wê yên li Kendavê ji bo parastina welatiyên Brîtanî hewldanên mezintir bikin, û erkê wî parastina jiyana van welatiyan e, û wiha got: “Balafirên Brîtanî wekî beşek ji operasyonên parastinê bi serkeftî êrîşên Îranê asteng kirine, li hewayê dixebitin. Lêbelê, tenê rêya rawestandina vê gefê ew e ku mûşek li çavkaniya wan werin tunekirin, ango li tesîsên depoyê an jî li qadên avêtinê yên ku ji bo avêtina mûşekan têne bikar anîn. Dewletên Yekbûyî yên Amerîkayê destûr xwest ku baregehên Brîtanî ji bo vê karanîna parastinê ya taybetî û sînorkirî bikar bîne. Me biryar da ku em vê daxwazê qebûl bikin da ku pêşî li Îranê bigirin ku êrîşên mûşekî li ser herêmê bike, sivîlên bêguneh bikuje, jiyana welatiyên Brîtanî bixe xeterê, û welatên ku di bûyerê de ne eleqedar in lê bixe.”
Starmer diyar kir ku sedema vê biryarê parastina kolektîf a welatên ku dost û hevalbendên demdirêj ên Keyaniya Yekbûyî ne û parastina jiyana welatiyên Brîtanî bû.
